Koṃṃool Rukok M. Langmos
Read in English: JP Beth Coger Talks Justice Reform Issues in Washington County
Ilo Arkansas, kajojo county ewōr juon an Quorum Court ñan kōjparok wāween ajeḷọk jāān im kōṃṃan kien ko an county eo. Joñan uwaan ro ilo Quorum Court in ej pādpād wōt ioon oran jarlepju eo ilo county eo. Quorum Court eo an Washington County ewōr 15 uwaan ro rej ṇae etaer Justice of the Peace ak Ri Kōjparok Kien Aeneṃṃan. Ijo wōt ke, Quorum Court in ej jerbal ippān doon ñan lali im etali kakien ko kab kōweeppān i ilo wāwein kab kilen kōjerbali jāān jān tax ilo county eo. Ej āinwōt City Council ak Board of Commissioners (juon doulul eo ej etali kakien ko ñan juon jikin). Meñe etaer Justice ej bar juon etan Judge ak ri ekajet, im ewōr aer maroñ ñan kōṃareik armej, akō rej board member im etali kakien ko an jikin eo – rej ri kien ro.
JP Beth Coger eaar kōmeḷeḷeik wāwein im unin an itok limoin ilo kien ko an county eo. Kōrā in eaar bōk kuṇaan ilo kweiḷọk eo an Quorum Court ilo 2019 im kōnono ikijjien $48 milien ñan kōḷapḷọk jikin kalbuuj eo ekkar ñan kajjitōk ḷọk jān Sheriff eo. Ilo kweiḷọk in, eaar iioon Sarah Moore eo kiiō ej executive director ñan non-profit eo ṇae etan Arkansas Justice Reform Coalition (AJRC).
Jibadbad AJRC ñan bōbrae kalbuuji elōñ armej (āinwōt ḷapḷọk im aetokḷọk kajje). Jān iien ñan iien rej kōṃṃan record sealing clinics ak katak ko ikijjien kilen bōbrae kwaḷọk an bwōd iuṃwin kien jān loi eo an ro jet. Kajje ko jān etto kab kajje ko ikijjien ruōn felony im ruōn misdemeanor, remaroñ eņojak jān mejān armej ak public. Elaññe juon armej eo eaar kalbuuj ej kabbōk jerbal, jikin jokwe, ak būrokraaṃ ko ilo jikuuḷ, kajje kein rejjab maroñ loi im eban bōbrae eok jān aṃ pukot iṃaan ñan eok. Policeman ro rej maroñ wōt in loi men ko ruoṃ bōtab raikuj mālim (akō warrant) ñan lali rekoot kein.
Ilo kweiḷọk ko ruo iṃaan, jikin kōṃṃan kien eo an Quorum eaar bouti jerbal ko an ordinance 9 ñan bōk jāān in jibañ ko jān federal ilo grant eo an SCAAP. State Criminal Alien Assistance Program eo ej ṃōttan būrokraam eo an federal government ñan jibañ kōḷḷāik/kōjepḷaakḷọk jāān ko ñan state wōnāān tarrin 4 raan in kajje ko ñe eaar wōr juon felony ak ruo misdemeanor kajje ko ñan undocumented immigrants, ri likin rein ejjeḷọk aer pepa ak kōmālim ñan deḷọñ tok iuṃwin kien ko an Amerika. JP Beth Coger im ro jet jilu ri kien raar bōbrae SCAAP ijoke 10 ri kien rej bout ñan kōweeppan e, ekoba JP Lisa Ecke. Ruo iiō eo lak, juon ri Majel ear ettōr ñan jibadek jea eo an District 6 bōtaab Ecke raar bar wiin im ej bout ippān rõ jet ri kien ñan kōjerbal jāān jān SCAAP grant.
JP Beth Coger im 3 iaan ro jān jikin kakien eo raar bout in jelke ṇae SCAPP bwe en jab im bōk jikin bōtaab rein 10 raar bout ñan kōweppen e, JP Lisa Ecke eaar ṃōttan rein 10 raar bout bwe menin en weeppan im tōprak. Ilo 2 iio remoot ḷọk eaar wōr juon likao in Majōl eo eaar kõtōpar ñan jea in ilo District 6 bōtaab Ecke eaar bar wiin i jea in im eaar ṃōttan rein 10 raar bout ñan kōweeppan e SCAAP.
Meḷeḷe ko SCAAP ej buki rej iḷọk ñan Department eo an Justice im ICE emaroñ kōjerbali ñan pukot rein ewōr “ruweer” im kōrọọl aj kōjepḷaak er. Ilo iiō eo ḷọk, grant eo an SCAAP eaar wōr an meḷeḷe ko ikijjien 187 ri-kalbuuj ro. Meḷeḷe kein rej kwaḷọk etaer, ñaat eo raar diwōj jān kalbuuj, atreej ko aer ilo iṃōko ṃweer im ilo jikin jerbal ko aer. Ibwilijin rein ekar wōr 109 ri Ṃajeḷ ro im 39 ri Mexico. Būrokraam in eaar leḷọk tarrin in $117,953 ñan kōḷḷāiki state kōn an bōk eddo in kalbuuj armej rein. Elōñ ri kien ro ilo Quorum Court raar kajeoñ bout ñan kōweeppan kakien kein alen ruo ñan kōjerbal jāān kein bōtaab raar jab tōprake. Rein ilo Quorum court eo renaaj bar bout i ejja wāwein in wōt ilo kweiḷọk eo epād iṃaan ilo Pāpode 15 raan.
Ilo jinoin Jānwōde in 2024, 21 likao in Ṃajeḷ ro ICE eaar bōk er im jilkinḷọk er ñan Louisiana. Likao rein repād ilo ekkōl jake in ke remaroñ kōrọọl er ilo an ejjeḷọk jibañ ñan er ikijjien jiṃwe im maroñ ko aer. JP Coger eaar juṃaeik meḷeḷe in ke county eo ejjab aikuj kar bōk jāān in jibañ ko ilo etan ri Ṃajeḷ jān grant eo an SCAAP kōnke grant in ej jerbal ñan jibañ kain armej ro im ejjeḷọk aer pepa/kōmālim ñan pād jokein. Armej in Ṃajeḷ rejjab aikuj aer pepa/mālim in jokwe im jerbal ijokein ekkar ñan koṇ ko iuṃwin Compact of Free Association eo. Mekarta emaroñ bōk juon tōre eo eaetok ñan ri Ṃajeḷ bwe ren maroñ erom juon citizen bōtaab rej maroñ wōt erom juon citizen in Amerika. Ijo wōt ke, compact in ejjab maroñ bōbrae aer kōrọọl ro im kakien kein rejelet er. Rein rej āliji kajje kein eloñḷọk jān juon alen. Kajje kein ikijjien aer wia kake im bōk/kōjerbal men ko rekajoor (drugs) ak kadek im kattōr.
Ṃokta ḷọk, ilo kar būrokraam in 287(g), ekar wōr ri jerbal ro an ICE im raar jerbal ilo jikin kalbuuj ko an Washington Country. Consul General eo ṃokta ḷọk an ri Ṃajeḷ kobaḷọk ippān elōñ ro jet raar kwaḷọk aer rie bebe in bwe Washington County eo en bōjrak im jab bōk kuṇaan ilo 287(g) in. Meñe Sheriff eo eaar kwaḷọk ke eṃōj aer kabōjrak 287(g) eo bōtaab eaar ba ej kab ḷapḷọk wōt aer kōrọọl armej jekdoon ñe ICE eaar jab pād ilo jikin kalbuuj ko.
JP Coger eaar kwaḷọk juon ḷōmṇak ak bebe bwe armej in Ṃajeḷ remaroñ kōṃṃan class action lawsuit ñan leṃaan ḷọk abṇōṇō kein rejelet er (jorāān ko rejelet elōñ armej). Eaar ba bwe jabrewōt eo im ekar wōr an rekoot jān tōre ko ṃokta ḷọk ren kajjitōk bwe rekoot kein aer ren kilōk. Ewōr rukok ilo Kajin Ṃajeḷ im Spanish im rej jerbal iuṃwin AJRC remaroñ jibañ kiil rekoot kein. Eaar ba bwe aolep ri Ṃajeḷ rein ren ṃaatḷọk im bwe ilo kweiḷọk in an Quorum Court eo epād iṃaan ilo Pāpode 15 raan ñan aer kwaḷọk ainikier iṃaan Quorum eo kōn wāwein an jelet im kakkure mour ko aer itok wōt bwe county ej bōk kuṇaan ilo būrokraam ko āinwōt SCAAP.