Etan in Maitha Jolet. Ej itok jān aelōn̄ in Ebon. Ijo eaar dik im rūttoļo̧k ie. Eaar itok n̄an Majuro ilo iiō ņe 1967. Rūttoļo̧k im jikuuļ ilo elementary school. Juon iaan jikuuļ ko rej ņaetan Rita Elementary School. Kadiwōjļo̧k ilo 1975 im etal wōt im kamōjļo̧k an jikuuļ ilo high school eo rej naetan Marshall Islands High School im ej pād ilo Majuro, capital city eo an M̧ajeļ . Ālikin jejjo iiō, eaar etal im jikuuļ ilo juon iaan jikuuļ ko ilo Utah. Ej ņaetan Weber State College. Jān 1979 n̄an 1981 eo. Ro̧o̧l n̄an Majuro im jerbal ilo elōn̄ jerbal ko im jerbal eo āliktata ikar jerbal ie ilo Bank of Hawaii ilo tōre eo me Bank of Hawaii ej pād ilo Majuro. Ālikin jet iiō eaar nan̄inmej kōn an kar jerbal im itok n̄an Hawaii, joļo̧k 3 ļo̧k n̄an 6 allōn̄ in an kar pād ilo aujpital eo eļap im raar jilkinļo̧k ri nan̄inmej jān government eo an M̧ajeļ n̄an aer taktō im pukot ejmour.
Ro̧o̧l n̄an M̧ajeļ im pād juon iiō im ewōr juon jein kōrā ear jikuuļ ilo juon iaan jikuuļ ko ilo America im ej pād ilo Dubuque, Iowa. Etan jikuuļ eo, University of Dubuque, Iowa. Im rej leļo̧k kilaaj in seminary ak katak kōn Bible. Ewōr jet baam̧le ko raar itok ilo 1993 eo. Raar jikuuļ m̧okta ilo Arizona ilo jikuuļ in Bible eo ijen im ālikin reitok n̄an Dubuque in. Ilo 1997 eo eaar ļōmņak in itok n̄an Dubuque im lale em̧m̧an ke n̄an bōktok baam̧le eo an bwe ren pukot ejmour, jeļāļo̧kjen n̄an ajri ro, im kōkōm̧anm̧anļo̧k jōkein mour. Em̧oot ke ilo M̧ajeļ ilo tōre kein kiiō elōn̄ aban̄ ko rej iiooni jān iien n̄an iien. Āinwōt an lōn̄ļo̧k im rūttoļo̧k population eo an M̧ajeļ, nan̄inmej ko reļap jān nan̄inmej in paijen rejinoe jelet armej. Barāinwōt jerbal ejjab lōn̄ n̄an aer kake n̄an armej ro kajojo ilo aelōn̄ eo. Kiiō ilo 1997 eaar ļōmņak in em̧akūt tok n̄an Dubuque, Iowa. Lale em̧m̧an ke n̄an ejmour im an baam̧le im mour im pukot em̧m̧anļo̧k eo aer.
Ilo an kar jinoe itok n̄an Dubuque, Iowa eaar juon iien eo me ebwe an kar pen. Eaar tok im jokwe ippān kōrā eo jein. Kōrā eo jein ekar nan̄inmej. Pād ilo nan̄inmej eo an nan̄inmej in er, menono im elōn̄ nan̄inmej ko im ejjab maron̄ jerbal ak ewōr jet nejin ajri ro me rej pād ikōtaan 11 iiō lōn̄ ļo̧k n̄an 18 ilo tōrein. Eaar bwe an aban̄ n̄an er ilo aer pād im pukot ilju im jeklaj eo an ajri rein nejin kōrā in jein. Ewōr bar juon baam̧le ālikin aer kar jikuuļ im rikaki ro wōj raar ro̧o̧l im jerbal n̄an Eklesia eo an Jar in rālik doon. Eaar pād wōt 2 baam̧le an John Enos im Wis Kanbeen. Im ke ij itok baam̧le ko rej pād ie.
Elōn̄ waween ko reppen ilo kar 1996 ālikin an congress eo an America kabōjrak an riM̧ajeļ taktō im bōk welfare ko me remaron̄ n̄a kar mour kaki ekar n̄an bujen eo M̧ajeļ kab America ear kōm̧m̧ane. Ikijeen nan̄inmej ebooļ armej rej nan̄inmej kōn kōkemelmel in bomb eo eaar kōm̧m̧an ilo iio kane 1940 liktak n̄an 1960 jima eo. Ilo tōre in nan̄inmej in baijin im m̧ōn̄ā ko kijen armej ro ilo aelōn̄ eo. Jet iaan aelōn̄ kan rejjab em̧m̧an n̄an aer jokwe. Rej pād wōt n̄an rainin. Bōtaab ekar n̄an kien eo an America ej kwaļo̧k ke em̧ōj an erreo im ejjeļo̧k aer bar eddo ilo waween in.
Menin būrom̧ōj bwe ilo an pād ilo Dubuque in ej loe ke eļap waween ko rej iooni eļaptata er riM̧ajeļ ilo aer pād. Rej jerbal bōtaab jerbal ko am rej pād ilo jerbal ke me rettā tata. Em̧oot adwōj jeļā ke kōm ej itok ekar wōt bwe kōm en jerbal ilo hotel, ilo factory ka, ilo nursing home. Bōtaab men eo em̧m̧an in armej in M̧ajeļ rej mour ilo juon naan eo me ekkā aer kijon̄ ba io̧kwe. Im jeļā karejar ippān doon im lale doon.
Ewōr juon health project an aolep armej in Pacific Island im rej naetan Pacific Islander Health project. Ilo health project in ewōr jet riM̧ajeļ ro rej pād im iuwaan advisory committee. E eo juon ej m̧ōttan im iuwaan advisory committee in n̄an jerbal eo an im jibadad im kōtōpar eo an eļaptata n̄an an kōnono ippān ri kōm̧m̧an kien ro an Iowa bwe ren maron̄ iļo̧k im kōnono n̄an congress eo an America bwe ren kōjeplaak tok taktō eo me kōm ar boke ilo iio kane 1986-1996 eo. Taktō kein im raar litok n̄an kōm em̧ōj aer bōki im kōm ejjab kōjerbale raanin. Bōtaab ewōr ri America ro ilo jukjuk in pād e rej pad ie ilo Dubuque, Iowa rej m̧ōņōņō in letok jipan̄ pukot waween em̧m̧anļo̧k n̄an ejmour an armej. Ilowaan project in, health project in ij kōnono kake, elōn̄ jāān ko rej jipan̄ kōm kōn copay, oņāān uno, im kajjeon lale nan̄inmej in tōn̄al eļaptata ilo adwōj jeļā ke armej in M̧a m̧ōttan nan̄inmej ko rej pād lōn̄tata ej nan̄inmej in tōn̄al, nan̄inmej in baijin, im nan̄inmej ko me rej itok jān baijin im ilo tōrein ejjab bwe. Im kōm ej pukot wōt kilen.
Ilo kar May 5 raan eo, ilo iiō in 2020, eaar deļo̧n̄ kōn nan̄inmej in COVID-19. Im ilo iien 95% recovery, ekar bōjrak in diwōjļo̧k n̄an m̧weo im̧ōn. Eļaptata ra eo an ejmour im ej kajjeon tariņaeik nan̄inmej in me epen im ejjeļo̧k en emeļeļe kake. Ke eaar deļo̧n̄ eaar ļōmņak ej bwe wōt an ejmour ilo tōre eo. Ālikin aer likit eo ilo bed, ejinoe attack im ijo eļap an kar attack e ilo erru. Eaar bōk nan̄inmej in pneumonia im eaar jaje ke ipād ilo pneumonia. Ekkar n̄an kar condition eo ke eaar deļo̧n̄tok ilo hospital. Ium̧win 20 raan, ekar isolate ilowaan room. Ejjeļo̧k en ej loe. Nurse ro wōt im taktō eo rej itok jibbon̄, raelep, jota, im iien kauno ko. Bōtaab em̧m̧an eo in an wōr juon kōjatdikdik ippa ke Anij Ej ial eo im mooļ eo. Em̧ōj an likit ippan ilo raan kein 20 ilo an watōke ej jet raan ko me reaitok. Bōtaab ilo an kar kōjparok mour im ejmour en̄in emaron̄ bar ro̧o̧l. Ilo Iowa, juon iaan emen ri M̧ajeļ ewōr tōn̄al im juon iaan jon̄oul ewōr an high blood. Ilo tōrein ajeeded in COVID, ekar wōr 7 ri M̧ajeļ iloan ICU an MercyOne Hospital eo ekar kojparoki kōn ejjeļo̧k oņāān $1 billion ilo healthcare. Barāinwōt, kiiō 12 armej iaan population in 800 ekar nan̄inmej im mij kōn virus in. Emaron̄ jimattan bwinbwin ro rej mij ilo Dubuque. Ewōr jiban̄ jān Pacific Islander Health Project im jet ro rej jerbal n̄an represent ro rej jokwe ilo bukwōn eo kab ro taktō im nuuj n̄an kwaļo̧k aikuj ko an ri M̧ajeļ ilo Iowa.
Kōm̧m̧an bwe kōjwōj en jeļā eo waween adwōj pād im mour ilo America in. Ejjab juon jikin eo me epidodo mour ie. Rej mour kōn jāān jej aikuj jerbal bwe baam̧le ko ad en maron̄ wōd m̧ōn̄a ioon table ko aolep raan otemjej. Kōm̧m̧an bwe ri jikuuļ ro nejid ren maron̄ em̧m̧an ineer ilo aer iļo̧k n̄an m̧ōn jikuuļ ko, kōm̧m̧an bwe ri jikuuļ ro en boden im em̧m̧an jikin aer jokwe bwe ren maron̄ pād ilo juon waween eo me em̧m̧an n̄an aer iļo̧k im jikuuļ. Nan̄inmej kein ej kōnono kaki kab jibadbad im kōttōpar kein, kōm ej pukot wōt kileer. Jet waween ko reppen n̄an er, eļaptata ilo aer itok n̄an America in. Bōtaab ewōr juon kōjatdikdik ippan bwe armej in M̧ajeļ im kōj ri M̧ajeļ. Kōj armej in jerbal. Jen kōjparoke. America ej juon laļ eo me elōn̄ kien ko ilo jikin jerbal jej aikuj ļoori. Kajin pālle ej juon iaan waween ko reppen n̄an kōm ej im̧aan tata. Ebwe an pen ilo ad jelm̧ae armej rein rej kajjitōkin kōj waween ta ko jejeļā ilo ad naaj kōm̧m̧ane jerbal kein. Bōtaab ālikin jejjo iiō im an armej pād America kiiō rejinoe jeļā. Rejjab lukkun jeļā kajin pālle bōtaab ebweļo̧k jidik. emaron̄ bwebwenato. Remaron̄ advocate. Remaron̄ kōm̧m̧an jem̧jerā ippān ro ilo jikin jerbal. Im jet kein waween wōnm̧aanļo̧k n̄an aolep ri M̧ajeļ ro rej jokwe ilo jukjukin pād eo an armej ilo Dubuque.