Read the news report by Hilary Hosia: Ebeye Celebrates 81st Kwajalein Kamoolol Day

Click through for Ebeye in Pictures: 81st Kamolol Day

Iakwe koṃ wōj aolep,

• Ṃoktata, kile im kaṃoolol Jemed Ilōñ kōn juon raan eṃṃan, barāinwōt kōn mour im ājmour.

• Kile ṃanit eo, Chairman Lanny Kabua, Vice Chairman Farrend Zackios, Iroij im Leroij ro, ekoba Owner eo ilo iṃweo ṃweir.

• Kile Iroij im Leroij ro jet an aelōñ kein ipeḷaakin Majōl in im ilikin Majōl in.

• Kile Mojen ko emen ilo Rālik in, im ikōnaan bar leḷọk juon aō special kile ejeṇoḷọk ñan Iroijḷapḷap Michael Kabua.

• Kile Iroijḷapḷap Christopher Jorebon Loeak, kile Leroij Neimat Reimers.

• Kile Reverend Lawson Matauto, Reverend Kauru Kaios, barāinwōt kile rikaki ro jet ilo kabuñ ko kajojo.

• Kile Aḷap ro, aolep armej in Kwajalein im rein rej jukjuk im amṇak ioon Ebje in.

• Special kile ñan rikweiḷọk ro 3 an Kwajalein, Honorable Senator & Iroij Drile Kili Kabua, Senator Kitlang Kabua, im Minister David Paul im ro karejareir.

• Kile Mayor eo an aelōñ in, Honorable Mayor Hirata Kabua im Korein Mayor eo.

• Aolep rein uaan Council in an aelōñ in Kwajalein im ro karejareir.

• Kile Mayor ro jet repād ijin ekoba ro rekar jab maroñ in koba tok rainin.

• Kile ro ṃōttad ilo Diplomatic Corps eo, ROC Taiwan Ambassador H.E. Steve Hsia; Australian Ambassador H.E. Paul Wilson, U.S. Ambassador H.E. Laura Stone, and Japan Ambassador H.E. Hirohisa Soma.

• Kile Speaker Wase, Vice-Speaker Zackhras, im ro karejeramiro; Minister im Senator ro repād ijin rainin ekoba ro jet raar jab maroñ in koba tok im ro karejerami.

• Kile Colonel Andrew Morgan of USAKA delegation eo ñan iien in

• Kile koṃ wōj kajojo.

Eḷap aō ṃōṇōṇō bwe kōmro Tommy maroñ in pād im bōk kuṇamiro ilo raan in Kaṃṃoolol in an armej in Kwajalein, juon raan eo eaorōk im ejeṇoḷọk. Ejeṇoḷọk raan in an riKwajalein kōnke  aelōñ in make ejeṇoḷọk ilo elōñ kain wāwein ko.

Ṃoktata, ñe jenaaj kalimjeke geography eo an Kwajalein, itok wōt jān an ḷap ṃaḷo ñe ilowaan aelōñ in, eṃōj kile im kalikkar ke Kwajalein ej juon āne ak atoll eo ekileptata ilo laḷ in. Kōn wāwein in, ejeṇoḷọk Kwajalein.

Ñe jenaaj kōnono kōn armej ro, Irooj ro ad reḷap jān Rālik rej bar itok jān Aelōñ in Kwajalein ekoba elōñ iaan President ro ad ṃaantak im rej bar jebar jān Kwajalein. Kōn wāwein in, ejeṇoḷọk Kwajalein.

Jej loe ke eobrak Ebje kōn armej in kajojo aelōñ in Majol, ro im raar jibadek tok Iroij rein aer ñan pukot jeraṃṃan ñan baaṃle ko aer kajojo, āinwōt ad jeḷā im meḷeḷe ke ewōr iaḷ ñan aer ello jeraṃṃan ilo US military base ñe ilo Kwajalein. US base in ej employer eo kein karuo, eo kein kajuon ej Kien eo ami, ilo an lōñ ro rej kōjerbale.

Ejjeḷọk bar armej in Majol rej uwe ilo teaj aolep raan im boñ ñan jibadek jikin jerbal ilo bar juon āne ak armej in Kwajalein. Ṃakūtkūt ioon dān ejjab juon men eo eñidodo ak wāwein in ej kwaḷọk joñan an ḷap kate im kijejeto ippān armej rein rej jukjuk im amṇak ioon aelōñ in. Jej ṃōṇōṇō kake er kōnke  jej loe joñan aer kate ir mekarta kōjwōj aolep meḷeḷe epen wāwein kein rej iooni. Jej loe ke eḷap aer uteej burweer kōn aelōñ in aer mekarta rej ioon abañ kein jān raan ñan raan im rejab ebweir. Kōn wāwein in, ejeṇoḷọk Kwajalein.

Ñe jenaaj bar reilik lak ñan history, Kwajalein ekar ṃōttan military installation ko reḷap an Japan ṃokta jān Amerika ilo bata eo an laḷ in kein karuo ak World War II. Thousand ri Japan im ri Amerika jiṃor rekar jako jān wōt bata eo ṃokta jān an kar ri Amerika maroñ anjo ioon ri Japan ro ilo Kwajalein in. Itok wōt jān an Amerika win i Kwajalein, ekar jipañ kapidodoikḷọk iaḷ eo aer ñan win i bata eo jān ri Japan ro ilo Pacific campaign eo aer iien tarinae eo. Rainin jej kakememej anjo eo eaar bōk jikin. Kōn wāwein in, ejeṇoḷọk Kwajalein.

Rainin, Kwajalein ej jerbal ñan missile defense im space program ko an Amerika. Eḷap an aorōk Kwajalein ñan national security eo an Majōl, Amerika im aolepān laḷ in. Jemaroñ ba ke eddo eo ñan dāpij im kōjparok aineṃṃan eo an laḷ in ej bar pād ioon aerad im ejjab ippān Amerika wōt ilo an wōr military base ioon Kwajalein. Kōn wāwein in, ejeṇoḷọk Kwajalein.

Jej emmemej ro reṃootḷọk iṃaan im kaṃṃoolol kōn aolep wāwein kein jej loe im mour kaki rainin meñe jet iien epen. Jej kile ke eḷap sacrifice ko an Irooj, Alab im armej in Kwajalein kōn jorrāān ko reḷap jān bata eo im ilo an kar eṃṃakūt armej ro bwe Amerika en kōjerbale bwidej ko aer bwe en waḷọk naan ñe jej ba “LUA”. “Ejjeḷọk ad.” Kōn wāwein in, ejeṇoḷọk Kwajalein.

Ṃokta jān ao kajeṃḷọk naan kein ao, ikōnaan bōk jidik iien im kaṃṃoolol Irooj ro im leadership eo an Kwajalein kōn aer kar kakobaiki tok kōjwōj ñan aelōñ eṃṃan mwin in aer bwe jān ippān doon im celebrate im kaṃṃoolol Anij eo ad Rikōṃanṃan kōn rainin eḷap im aorōk. Jej loe ke eḷap tōprak. Im jej bar loe jān tōprak kein, eḷap ad kōjatdikdik kōn juon ilju eo e jeraṃṃan!

Āinwōt ami wōj kate koṃ, Kien eo ami ejab kiil mejen jān abañ ko rejelet koṃ. Jān iien ñan iien, ñe jej roñ kōn abañ ko rej waḷọk, Kien eo ejab pād ak jej bōk buñtōn ko reḷap ñan jipañ mejel ḷọk apañ kein rej lukwōj koṃ. Jej bar kate kōj pukot jeraṃṃan ko jān likin ilo ad jerbal ippān partner ro ad im barāinwōt kajeoñ kañol tok laḷ ko jet ñan kōṃṃan bujen jemjera ko rekāāl ippāer ilo ad lale ta eo jemaroñ jipañ doon kake.

Partnership eo ad ippān Amerika, Japan, Taiwan, Australia, koba laḷ ko jet im development partners ro jet āinwōt World Bank, Asian Development Bank im Green Climate Fund eḷap aer aurok – jaikuji er ñan jipañ kadōkḷọk Aelōñ Kein Ad im rej bōk im ña wōt. Seawall Project eo jej launch e rainin ij kūrṃool kōn jipan jān jet iar partners rein ad. Eḷap unin bwe jān kaṃṃoolol leadership eo an Kwjalein ekoba ri kweiḷọk ro an Kwajalein ñan Nitijela im Mayor eo im Council eo an Aelōñ in. Ewōr unin bwe jān kaṃṃoolol im bwe en ḷap kōjatdikdik.

Jej jar wōt im eḷap kōjatdikdik ke iaḷ ñe iṃaan emeram. Āinwōt an lale Iroojḷapḷap im President Imata Kabua kijjien ba – Inmen Eo Inmen. Inmen Anij.

Bar juon alen, ilo etan kien eo Ioḷap, jeraṃṃan ñan armej in Kwajalein.

H.E. President Heine and First Gentleman Kijiner attend Kwajalein Atoll Kamolol Day 2025