Ewōr juōn al lellap ro jinemro Kaminaga Kaminaga raar katain
eō kōn “iien” im eļap rōjan̄ eō jān wōt kar minit eo iaar ron̄jake
n̄an minit in: “Niknik kōn iien im jab jerwaan e bwe,
Iien ej jab am im aō. . .”
—Composer: Litty Kaminaga
Jān naan kein ilo al in ewōr jejjo kajjitōk re jiktok —lamlam in am lale iien enaaj jarjartok wōt jān uwaak ko am n̄ an kajjitōk kein): 1) Elan̄n̄e ejjab ad iien, innām an wōt iien? Im 2) Ewi wāween ad jerwaane iien?
Emaron̄ bōlen alikkar ippān jet wāween ad jerwaane iien; mekarta, in mōk kajjitōk bwe ewi wāween ad jerwaane men iien? N̄e kwo jab tōparļo̧k jikin jerbal en am ekkar n̄an iien eo em̧ōj kar errā kake ilo karōk im kontrāāk, kwo kakkure ke iien? Ak ilo am “kōmate” ilo jikin jerbal en am im bōk men en wōņāām, an wōn en iien kwo kakkure? An wōn iien en kwo kwo̧o̧te?
Rūtto ro ad n̄e ej wōr nejier waj (watch), ekanuij ļap aer kōjparoke kōnke e jipan̄ er kōjparok iien. Jimmaō ekar juōn ian lōlļap ro e kar ejjeļo̧k nejin waj ak e kar jab rumwij n̄an jabdewōt iien e kar aorōk ilo jukjukin pād en i’Kibinmeto kan. Oktan an jab rumwij, enan̄ in aolep iien ej mōkaj kemem, jar, marre, jerak. Ewi wāween an kar jeļā kōjparok iien? Kwōj jab kiki aetokļo̧k jān 4:30 a.m. bwe iien kadjo̧eo in. Naan in “mōmman in kaimōk raan” ej unin tōl eo an lōlļap jab in. Ippān kako en moktata im jimarok ej iien jerkak eo ņe, e ban ir.
Jimmaō e kar judon deacon n̄an United Church of Christ im eaar kanuij kar niknik kōn kwoņaaņ. Bell en moktata ej pād ilo jea eo kein karuo ianbwijmaron̄ jān m̧aantata ilo imōn jar eo an eklesia eo an, jekdoon n̄e ejjan̄ in jan̄ bell en kein karuo bwe en jino delon̄ tok jejjo ri jar. E lak maattok ri jar ālkin bell en kein kajilu, jimmaō ej kōttar.
Ewōr juōn naan em̧ōj watōke bwe ej bwinid ri Majōl: Marshallese Time. N̄e baj n̄a eo, eļap aō kōraate naan in. E ban ijjino juōn iien eaorōk m̧ae iien eo ri kaki en an eklesia en ej pād n̄ an kōpelļo̧ke iien en. Juōn kemem e kar jab jinoe men̄e irooj eo, aolep lab ro, im aolep armej ilo jukjukin pād eo ak kōmij kōttartok ri kaki eo. Ekanuij alikkar jān wanjon̄ ok in ke iien eo kōm wōj ar kōttartok ri kaki in e ban bar rooltok.
Juōn al in jae ej ba: “Koortokjān iien emman,
Ren jab ellā jān kwe. . .
Iien ej pelļo̧k ioon pein jarom;
Ej itok im wōnm̧aanļo̧k, ilo ial eo an. . .”
LDS hymnbook, #226
—Translator: Lanny Lane
Bar juōn wāween ad kōjparok iien. Jet ian rūtto ro ad rekōn jutak ilo meram in al im jon̄e annan̄ ier. Aetok in an annan̄en ioon lā kan rej kwalo̧k awa en. Jet ian kapen ro relļap ad jekōn lak kajjitōk wa en aer ej jidaak n̄āāt? “Mokta jān Likabwiro,” ej uwaak eo re kōn jo āne tak. Elan̄n̄e ej jab, re ba jenaaj jerak in ok aetok n̄e ewalo̧k m̧aan dekā en im̧aan bar ņe ruo ne jān ioon aejet.
Lale lan̄ mōk. Etke kwo jeļā ke e bun̄ļo̧k din̄din̄in Mājilep? Ak ta en ej kalikkar naan in “pataan allōn̄ ņa irilik? Ak pataan allōn̄ ņa irear? Ak ta in jetn̄ōl? Ak jetmar? Ak ewi wāween ad jeļā ke e iien ka-lejepjep ikibin to kane i Majōl? Ak elan̄n̄e kwaar jaje allōn̄ ņe Māe ej ijjino, ewi wāween an naaj kar jelā? Eokwe Maaj, allōn̄ ņe im̧aan Māe, ej iien eo ej wōnm̧aanļo̧k mennin eddōk otemjej an rak. Jino in rak en̄ ņe. Mā eo ņe, ejino jutak. Aolep tōrre kein rūtto ro ad raar kōjparoki kōnke lukkun mour eo aer eaar pedped ioer. E lak oktakļo̧k tōmak kein ad im jej kiiō ri Kristian eaikuij kar lapļo̧k ad kōjparok iien bwe jej watōk e bwe iien ej an Anij. Jej aikuij kaliktit kōj jān “Marshallese time” bwe jet wōt kein jikin.