Read in English: Afghan Father of Six who Aided U.S. Special Forces Dies in ICE Custody

Juon likao in Afghan eo eaar jipañ Ri-Tariṇae ro an America eṃōj mej ilo an kar pād ilubiden pein ICE ro; Baaṃle in an lein in ej pukot wōt uwaak ko ikijjien mej in an likao in

Ilo kar juon tōre ke Army Special Forces eo an America in eaar pād im kōṃṃani jerbal in tariṇae ko aer ilo Afghaanistan, raar bedbed ioon ri-afghan ro ijo im raar ṃōṇōṇō in joḷọk aer mour ñan jipañ er im jerbal ippāer.

Nazeer Paktyawal eaar juon iaan rein raar ṃōṇōṇō in jipañ ri-tariṇae ro an America ilo tōre kani.

Ilo jinoin 2005 eo, ekar jino an jerbal ippān Army Special forces eo an America ilo Afghanistan ilo bukwōn ko an Paktika. Ke ekar bar jebḷaak tok Taliban ro im bōk kauntrōl ilo 2021, e kab kora eo ippān im ajri ro nejierro jiljino rekar aikuij in kōṃakūt er ñan America kōn jerbal im service ko an.

Rar jokwe im mour ilo Texas.

Likao eo jein ekar wõr juon an business in ettōr kōn wa truck ko rekillep, im Nazeer ej kōjatdikdik bwe emaroñ in jipañ baaṃle kein jiṃor, ilo an naaj ettōr kōn truck kein. Bōtaap ewōr jet kakien ko jān kien eo ioḷap akō federal government eo ikijjien kōṃṃan lijen raar rejelet im kōṃṃan bwe en pen kilen kab wāwein an kōkāāle commercial driver license eo an ālikin an ukot atreej eo an. Baaṃle in ekar bar ioon jet wāwein ko repen āinwōt apply ñan bōk jipañ ko āinwōt SNAP akō jipañ eo jān kien ikijjien ṃōñā. Ejja ilo ien in wōt likao in ej kajjieoñ in kakoṇ mour in an ioon America kein.

Ilo kar March 13 raan eo, Nazeer eaar pojak bwe en bōkḷọk ajri ro nejin emen (4) ñan jikin jikuuḷ ke agent ro an ICE rar jibwe im kalbuuji inabōjin kapijuknen eo an.

Kōrā eo ippān eaar jiroñ ḷọk ro jān jikin news ko bwe eaar kajeoñ ba ḷọk ñan agent rein an ICE bwe Nazeer eaikuji inhaler ak kein menono eo an, bōtaap ej ba bwe rar jab roñjake.

Jọteinin ejja raan eo wōt, Nazeer eaar kalle leo jein jān jikin kalbuuj eo an ICE.

“Ijaje, āinwōt juon e men ewaḷọk ñan eō. Ejjab eṃṃan aō menono. Emetak aolepān ānbwinū, im eḷap aō udidid im menokadu.”

Jet awa tokālik juon iaan agent ro an ICE eaar ba ḷọk ñan baaṃle in an bwe eṃōj aer bōkḷọk ñan aujpitōḷ. Raan eo juon, raar kalle ḷọk likao eo jein bwe eṃōj an mej Nazeer ilo Parkland Memorial Hospital eo ilo Dallas.

Department eo an Homeland Security eaar ba bwe pepa ko an Nazeer im eaar kemālim an pād America kein eṃōj aer expire ak jeṃḷọk kitier im raar barāinwōt bōklōñ tak men ko ruon im raar enoik bwe eaar kōṃṃani bōtaap ejjeḷọk kaṃool ke eaar kōṃṃani ikijjien kooti im kōjerbal SNAP ko ejjab an.

Baaṃle eo an im ri-tariṇae ro ṃōttan raar kajur ilo aer kōnono im juṃae men in eṃōj enoik likao in kake. Houston Public Media eo kar etale im lale eḷaññe pepa in nebar (certificate) in an likao in jān U.S Army Special Forces eo ej kwaḷọk im kaṃool bwe likao in “eaar leḷọk an mour im jerbal ippāer.”

Shawn VanDiver, president eo an AfganEvac, eaar kwaḷọk an enoik uwaak eo an kien eo ioḷap ikijjien menin:

“Ej kwaḷọk im kalikkar ñan kōm bwe ICE eaar kalimjek wōt ruo un ko rejjab ekkejel ḷọk ilo aer kar ṇa ruon im kalbuuji likao in, im jab ilo aer kile āinwōt juon jemen jiljino (6) ajri, im juon likao eo eḷap an ājmour im ej kab 41 an iiō, eo ear mej ilo an kar pād iuṃwin peier. Ijjeḷọkin aer kwaḷọk aer naan in būroṃōj ḷọk ippān baaṃle eo, raar ba bwe likao in ej juon criminal im kajej tokjen an kar leḷọk an mour im jerbal im jipañ laḷ eo ad.”

Etke Chickin Melele ej kwaḷọk kōn bwebwenato in?

Meñe eoktak mālim eo an ri Majōl ñan pād ijokein iuṃwin Compact of Free Association eo, ak elōñ wōt baaṃle ko renaaj kile im loe an kar Nazeer kōnaan kar lale im kakke aikuj ko an ajri ro nejin meñe epen ilo an jet kakien ko rejelete ke eaar kabbōk jerbal im kajeoñ bōk jipañ ko jet jān jukjukin pād eo. Bwebwenato in an lein ej kwaḷọk jekjekin im jellen wōt an kajojo ro ilo jukjukin pād ko kate er im kōṃṃan jokelet ko rejelet mour ko aer ilo aer jerbal ñan America. Meñe rej kejekdoon aer mour im jerbal ñan ri America ak elōñ wōt iaer rej ioon men ko reppen ilo aer pukot juon mour eo eṃṃanḷọk ñan er im baaṃle ko aer.

Bwebwenato in ej kab diwoj tok ej kwaḷọk wōn eo kar Nazeer, kajjitōk ko baaṃle eo an ej kajjitōk jān jinoin ñan kiiō, im ewi wāwein an bwebwenato in an likao in aorōk eḷapḷọk jān kakien ko an immigration.