Read in English: https://chikinmelele.com/covid-19-in-kosrae-and-pohnpei/
Nón Súnae 19, ach we mwuun FSM a sinei pwún mei fite mén aramas a urir ewe semwen COVID-19 won fénúwach kewe Kosrae me Pohnpei. Nón ewe Súnae 18, mei wor rúemén chóón fiti ewe sepenin ra úwei chóón niwiniti fénúwach Kosrae mei posetif ar tesin ei semwen COVID-19. An ewe KSA pútáin pióing ra tesini chóón nón an ekewe rúemén aramas ir chóón sukkun famini, engon me neir ekewe engon me emén nón ekewe famini mei posetif ar tes. Rúwe me wanimén aramas mei pwá esisinen ewe semwenin máter mei tori an Kosrae we pioing. Rúwe me nimén me neir mei posetif ar tesin ewe semwen COVID-19. Mei napenó fetánin ei semwen.
Nón ewe wik sia tou seni, a napeseni engéreú (1,000) chóón urir ei semwen. Napeseni esop úkúkún ekkei chóón urir nón fénúwach Pohnpei, nusun nón Kosrae. Mei wor ekewe fitú keis ren ei semwen kich mei kuna me ren ekewe re tonong nón kinikinin fénúwach kei nón ewe ier sia toú seni, ren ekewe fisu (7) keis nón Chuuk, pwan ekewe únúngát (3) keis nón Yap, meinisin ekkei si kuna me niapeni ar tonong nón kinikinin fénúwach kei. Ach we mwuun Pohnpei a túngór ngeni meinisin chóón nón fénúwach kei ar resap ámwicheich, repwe mesemes pwénúpwénún aw me pwét fansoun meinisin, repwe angei ewe óppósún eppetin ei semwen iká rese mwo angei ei óppós, pwan nó ngeni pióing iká ra kuna me mefi esisinen ewe semwen iká máter.
Nón ewe Súnae 24, 2022, ach we mwuun FSM mei afata ngeni kich ren néúch we améfén Vice President T.H. Yosiwo George an núing pióing me Pohnpei an úri ei semwen COVID-19. Mei pwan wor rúwemén aramas mei safei me núing nón ach kewe pióingen ren ei semwen. Ach we mwun FSM mei afata ngeni kich pwun ewe áewin aramas mei mánó ren an úri ei semwen COVID-19 emén mwán a mwukenó mei pwan wor an pwisin semwen mei nonom won a manó nón ewe Súnae 25. Néúch we Vice President Yosiwo P. George mei chék nomw nón pióing, nge mei ekis chikaretá. Fitemén néúwisen ach we mwuun FSM me chóón ach ewe cabinet mei posetif ar tesin ei semwen COVID-19 iei. Mei fitú ekewe pútái me nenien mwéngé won fénúwach kewe Pohnpei me Kosrae a kesipw nón ei ótún, esap seni éúréúrer seni mwun nge seni an ese chiwen naaf néúr chóón angang.
A napeseni engeréú rúwepwúkú (1200) keis ren ei semwen pwan wanúmén aramas (8) ra núing pióing nón FSM. Ren fénúwach Chuuk úkúkún nime ngeréú (50,000) aramasen ie, ina waten me nón FSM, pwan Yap úkúkún engon me rú ngeréú (12,000) aramas ie, ekei fénú ese mwo torir ei semwen COVID-19. Nge mei wor ew mwich úkúkún fik (70) aramas seni Yap re nó Pohnpei ar repwe fiti ewe mwichen Micronesian Expo 2022, ra pwan niwin nón Súnae 29. Ren Kosrae, pokiten ew chék fénú e efisatá ew state, iká mwo e chó kúkún keis seni Pohnpei ren ei semwen, nge mei tongeni wate pésen (percent) seni Pohnpei, iká mwo e chómong keis nón Pohnpei. Ach we mékúren FSM ren Pohnpei, ina epwe úkúkún 36,196 aramas re nonom ie. Iei a úkúkún 818 keis ren ei semwen, iká 2.3% ren úkúkún aramas re nom Pohnpei. Ren Kosrae, úkúkún aramas re nom ie mei tori 6,616 iei chó kúkúnún aramas me nein fénúwach nón FSM, nge iei a 433 keis ren ei semwen, iká 6.5%.