Read in English: ICE Ride-alongs in Central Utah Disrupt Community and Prompt Local Police to Rethink 287g Partnership

Ilo Sanpete County, Utah, juon eneo ewōr bukwōn jidik ie, bōḷij ro an North Valley rej jerbal ñan elōñ iaan bukwōn. Juon iaan ej Moroni, im ewōr juon wōt elementary school, juon wōt middle school, im juon jikin kōṃṃan pao (turkey) eo ej jerbal iuṃwin Norbest im ṃōttan Pitman Farms. Eṃōj an ṃōttan mour in kōṃṃan jāān eo an Moroni iuṃwin elōñḷọk jān 85 iiō. Moroni service agreement; The Salt Lake Tribune; Utah MEP.

Juon eṃṃaan eo ej jokwe ilo Fountain Green ear kwaḷọk ke ewōr jejjo ri-Micronesia ilo Sanpete County, ilo Moroni im Mount Pleasant. Im ṃōn jerbal in ej juon iaan jikin jerbal ko reaorōk ilo eneo in, im ewōr 500 ri-jerbal ie. Eṃṃaan in ear ba ñan Chikin Melele bwe elōñ iaan ri-jerbal rein rej Hispanic, ak jet Pacific Islanders rej bar jerbal ie. Ekkar ñan American Community Survey eo an Census Bureau ñan iiō ko 2019–2023, ewōr 44 Pacific Islanders ilo Moroni, ak enañin 3.6% in aolep armej ro ilo bukwōn eo. Demographic source.

Ilo August, North Valley Public Safety Department ear jain juon bujen in 287(g) ippān U.S. Immigration and Customs Enforcement, ak ICE. Bujen eo enaaj kōtḷọk an bōḷij ro ilo eneo eo, ālikin aer bōk katak, kōṃṃane jet jerbal ko an immigration iuṃwin tōl eo an kien eo an Amedka. Emaroñ bar wōr jipañ in jāān, kein jerbal, im katak jān kien eo federal. Jipañ rōt in emaroñ lukkuun aorōk ñan jikin bōḷij ko ilo bukwōn jidik ko rej kate aer kōḷḷā wōnāān jerbal ko an bōḷij.

Ekkar ñan Bōḷij Chief Steve Gray, ear wōr 11 bōḷij ilo North Valley. Ilo September 30, eṃōj an ḷalem iaan dedelọk aer bōk aunlain katak eo an ICE. Ear ba bwe ICE ear kajjitōk bwe ri-ICE ro ren etal ippān bōḷij ro rej bōk kuṇaer ilo būrookraam eo, bwe ren lo wāween an būrookraam im system ko an kien eo federal. Gray ear ba bwe ear kōjatdikdik bwe bujen eo enaaj oktak wāween an jikin bōḷij eo an kōnono ippān ICE ālikin aer jibwe armej kōn aer rupe kien ko rej jab ekkejel ippān immigration, ke bōḷij ro an rej wōnṃaanḷọk wōt im kōṃṃane jerbal in bōḷij ko aer āinwōt aer ekkā kōṃṃani. Sanpete Messenger, October 8.

Ilo September 30, emān ri-ICE raar itok ñan etal ippān jilu bōḷij ro an North Valley ilo aer lale bukwōn ko. Gray ear ba bwe ear kōjjeḷāik bōḷij ro an bwe ren uwaak kall ko im kabōjrak wa ko āinwōt aer ekkā kōṃṃane. Ear ḷōmṇak bwe an ri-ICE ro etal ippāer ej juon iien ñan an bōḷij ro an katak kōn wāween an būrookraam im system ko an jerbal in ICE. Ak ilo aer wōnṃaanḷọk ilo jota eo, iien kabōjrak wa kein raar erom iien ko ri-ICE ro raar kajjitōk ippān armej im jibwe er.

Ilo eneo epaak ñan jikin kōṃṃan pao eo ilo Moroni, ri-jerbal ro raar kwaḷọk bwe jerbal in jibwe armej kōn immigration ear lapḷọk ke eṃōj aer jerbal. “Kōm ar dedelọk jerbal ilo 9 awa jota, im ālikin, raar lukkuun kabōjrak armej ilo wa ko aer,” juon ri-jerbal ear ba ñan Sanpete Messenger. Bōḷij ro an eneo eo raar kabōjrak wa ko kōn aer rupe kien in ettōr im kajjitōk ñan laijen ko an ri-kattōr ro. Ri-ICE ro raar etal ippāer raar kōjerbal meḷeḷe ko im database ko an ICE ñan lale jekjek in immigration eo an armej ro, ṃokta jān aer bōk eddo kōn ṃōttan jerbal eo ekkejel ippān immigration.

Ilo jemḷọkin jota eo, eṃōj aer jibwe ḷalem armej im likūt er iuṃwin lale eo an immigration. Ejjeḷọk iaan ri Pacific Islander ro raar jibwe er ilo aer kabōjrak wa kein ilo Sanpete County. Ak ilo Moroni, men eo ear walọk ear jelōt elōñḷọk armej jān ro raar jibwe er. Ajri ro raar jab etal ñan jikuuḷ, ekkar ñan ripoot ko, ri-jerbal ro raar pād wōt ilo ṃweo, im jet jikin peejnej ko ilo eneo eo raar kilōk ke baamḷe ko raar mijak in diwōj jān ṃweo.

Juon eo ej jokwe ilo eneo eo im ear kwaḷọk an kōṃṃeḷeḷe ñan Chikin Melele ear ba bwe armej ro ilo kumi eo an Hispanic raar “kōṃṃan elōñ men ñan kabūromōj er, kamijak er, im jibwe er iuṃwin jet tōre.” Ear kwaḷọk bwe mijak eo ear jab kōn deportation wōt, ak ear bar kōn wāween eo bōḷij ro remaroñ kaeñtaan armej ñe rej ioon er. Mijak in ear kōṃṃan bwe ajri ro ren pād wōt ilo ṃweo im jab etal ñan jikuuḷ, meñe elōñ iaer raar ḷotak ilo Amedka.

Men ko raar walọk ilo jota eo raar bar kōṃṃan bwe Gray en bar ḷōmṇak kōn jerbal ippān ICE. Ekkar ñan Sanpete Messenger im KUTV, bōḷij ro raar bōk kuṇaer raar kwaḷọk aer inepata kōn wāween jerbal ko an ICE, kōnke ej jekkar ñan kien im pedped in jerbal ko an North Valley. Gray ear ba ñan Messenger bwe jipañ in jāān eban eṃṃan ñe aer kōtḷọk an jerbal in jibwe armej kōn immigration enaaj kaeñtaan an armej ro ilo bukwōn im kadikḷọk likūt ilo bōḷij ro an.

Ri-jerbal ro an kien eo federal raar ba bwe ear ejjeḷọk jikin peejnej raar kōttōpar. Ripoot ko ewōr kiiō rej jab kaṃool bwe ear wōr armej raar jibwe er iloan ṃōn jerbal eo. Akō Sanpete Messenger ear bōk juon bideo eo juon ri-jerbal ear rekooti ke ear jutak ioon roof eo an ṃōn jerbal eo.

Gray ear ba ñan Messenger bwe ear jab jeḷā etan aolep armej rein ḷalem, unin an ICE jibwe kajjojo iaer, ak ia eo raar bōk er ñan e. Ear ba bwe bōḷij ro an eneo eo raar jab jeḷā ñe ri-ICE ro raar jibwe armej rein kōn jekjek in immigration eo aer, juon warrant, ak bar meḷeḷe ko ilo database ko aer. Bōḷij ro raar leḷọk jet kōjjeḷā im ticket kōn rupe kien in ettōr, ak ear ejjeḷọk ripoot eo ededelọk kōn aolep iien ko raar kabōjrak wa kein.

Bōḷij ro ilo eneo eo rej bar ḷōmṇak kōn aer jerbal ippān ICE

Juon eo ej jokwe ilo Fountain Green ear ba ñan Chikin Melele bwe ri-kaki ro raar kwaḷọk kōn ajri in jikuuḷ ro rej Hispanic im raar pād wōt ilo ṃweo. Ear bar ba bwe jet peejnej ko an ri-Hispanic ro raar kōjjeḷā ilo peij ko an bukwōn eo bwe renaaj kilōk: “Peejnej ko ri-Hispanic ro rej tōl raar kilōk (raar post ilo peij ko an bukwōn eo bwe renaaj jab peḷḷọk).”

North Sanpete Middle School ear rekoot 80 ajri raar jab itok ñan jikuuḷ, im Moroni Elementary School ear rekoot 56 ajri raar jab itok—joñan in ej juon iaan kajjojo ḷalem ajri in jikuul. Superintendent O’Dee Hansen ear ba ñan The Salt Lake Tribune bwe juon ajri in jikuuḷ ear kwaḷọk bwe juon iaan jinen im jemān ear pād iaan ro raar jibwe er. Ear ba bwe būroṃōj im mijak eo jān men eo ear walọk ear alikkar ilo ajri ro.

Meñe “elōñ men eṃōj aer bar jepḷaak ñan wāween eo ṃokta kiiō,” jerbal in jibwe armej kōn immigration ear jelōt jikin jerbal ko ilo iien eo wōt. Juon eo ej jokwe ilo eneo eo ear ba ñan Sanpete Messenger bwe, ekkar ñan an ḷōmṇak, enañin 30% wōt in ri-jerbal ro an jikin kōṃṃan pao eo raar itok ñan jerbal ilo raan eo tok juon. Juon ri-kattōr truck ear kwaḷọk bwe raar ba ñan e bwe en pāāk truck eo an, eo ewōr turkey ko rej mour ie, kōnke ear jab bwe ri-jerbal ñan bōk eddo kōn turkey kein. Sanpete Messenger, October 1.

Bōḷij ro jilu an North Valley raar bōk kuṇaer raar bar kwaḷọk aer inepata kōn wāween jerbal ko an ICE ālikin an ri-ICE ro etal ippāer. Chief Gray ear ba ñan Sanpete Messenger: “Bōḷij ro aō raar itok im ba bwe wāween jerbal kein rej jab āinwōt wāween eo North Valley enaaj kōṃṃane jerbal in bōḷij rōt kein.” Juon eo ej jokwe ilo Fountain Green ear kwaḷọk bwe jet wōt armej raar rejetake wāween jerbal ko an ICE, ak ear ba bwe “aolep ro jet rej lukkuun būroṃōj im inepata kōn men eo ear walọk.”

Gray ear ba bwe jet ṃōttan wāween jerbal ko an ri-ICE ro raar jab ekkar ñan kien im pedped in jerbal ko an North Valley: “Rej jerbal iuṃwin bar juon kumi in kien ko rej oktak jān ko kōmij jerbal iuṃwin.” Ear bar ba ñan nuujpepa eo bwe jipañ in jāān eban eṃṃan ñe aer kōtḷọk bōḷij rein ñan bōk kuṇaer ilo jerbal in jibwe armej kōn immigration bwe enaaj kaeñtaan an armej ro ilo bukwōn im kadikḷọk likūt ilo bōḷij ro an.

Ri-Fountain Green eo ear kwaḷọk kōn bōḷij ro bwe “armej ro ilo bukwōn eo rej iakwe er, im rej āinwōt eṃṃaan in baamḷe ro rej lukkuun kea kōn armej.” Ear ba, “Ñe inaaj kōṃṃan juon ḷōmṇak kōn unin, inaaj ba bwe an armej ro ilo bukwōn eo kwaḷọk aer jab errā ear unin eo eḷap an aer pepe in jino jepḷaak” jān bujen in 287(g) eo.

Ñan kiiō, jikin bōḷij eo ejjañin bōk jipañ in jāān jān kien eo federak iuṃwin bujen eo, im Gray ej ba bwe renaaj jab apply ñan e. Ak board eo ej tōl jikin bōḷij eo ñe renaaj wōnṃaanḷọk wōt ippān bujen in 287(g) eo. Sanpete Messenger, October 8.

Ilo juon uwaak ilo October 9 eo KSL ear ripooti, DHS ear kōṃṃeḷeḷe ñan rejetake jerbal eo raar kōṃṃane. Ear ba bwe armej rein ḷalem raar jibwe er ear ejjeḷọk aer mālim ekkar ñan kien ñan pād wōt ilo Amedka, im ear wōr rekoot in rupe kien ko aer, ekoba kattōr ke rej pād iuṃwin jelōt eo an arkool ak uno ko, kattōr ilo juon wāween ekamijak, im rupe kien ko kōn kein kōjerbal drug. DHS ear jab kwaḷọk iaan men kein eṃōj an court kaṃool bwe armej rein raar rupe kien, im iaan rej wōt naan in na ruon ko rej kōttar pepe jān court. KSL, October 9.