Read in English: Fatal ICE Shooting in Houston Renews Calls for Accountability
Juon wāwein eo eaar bōk jikin lo Houston ilo an ICE ro kar bu im eaar lōñ ro raar jorāān im eaar juon menin elewetak ñan kōṃṃan ukoktak ko reṃṃan im jiṃwe ilo kien.
[Update: Likao in Mexico eo eaar jokwe ilo Texas in iumwin 30 iiō ak eaar ejjelok an mālim bōtaap ajri in America ro nejin raar sponsor e an pād jokein. Kiiō emōj an mij bwe ICE ro raar buuki. Bar juon likao in Columbia eo eaar jokwe ilo Maine raar bar buuki ilo wiik eo lok ak ewōr an mālim im pepa ñan jerbal jokein. Ejañin alikkar ñe ICE enaaj lukkun kaoktak wāwein aer kōmman traffic stops ak kõjerbal body cams.]
Enañin 30 iiō ko reṃootḷọk, Lorenzo Salgado Araujo eaar kalōk elōñ iṃōn jokwe ko ipeḷaakin Houston.
Eaar itok ñan America kein jān Mexico ke ej laddik wōt, eaar wōr 3 nejin emmaan im eaar pād im mour ippān kōrā eo ippān iuṃwin 30 iiō, eaar ettōnak e juon ilju eo eṃṃan ñan baaṃle in an. Juon iaan laddik rein nejin eaar rūtto ḷọk im juon rikaki an jikuuḷ. Leo juon eaar kadiwōjḷọk jān University eo an Tuffs. Im diktata eo ej pād ilo college kiiō.
Baaṃle eo an Lorenzo rej ba bwe Lorenzo ej juon waanjoñak eo ej kwaḷọk jekjekin naan in American Dream akō kōmeḷeḷe eo juon, ijo in kōj jibadeke ñe kōj kōnan pād ilo juon mour eo eṃṃan im jokkun wōt juon ej ilo aṃ itok ñan America kein.
Ilo July 7 raan eo, mour in an Lorenzo eaar kadu ke ICE rein rar bu ki ḷoḷḷap in 52 an iiō eo im ej juon rikkal em ilo Houston. Raan tokālik, opij eo an homeland security eaar kwaḷọk ke Lorenzo ejjab armej eo raar pukote in kalbuuji.
Baaṃle in an Lorenzo raar kwaḷọk aer naan ke raar baj pojak wōt bwe ewōr aer kar ekkil ñe ICE rein ren kar jibwe im kabojrak ḷoḷḷap in. Lorenzo ewōr an pepa ej buki wōt ippān ñan kaṃool ke ajri rein nejin rerūtto im rej jet citizen in America rej sponsor e ilo an pād ijokein. Rej tōmak bwe enaaj kar bokake ICE rein ñe en kar jeḷā ke rej jet policeman ro an ICE. Rej barāinwōt tōmak bwe ilo tōre eo rej worwor e im elōñ wa ko ejjeḷọk kōkale ie rej kaboole ilo jikin jerbal eo an ej ḷōmṇak ewōr ri-nana ro rej kajeoñ tōn mane koote men ko ṃweien.
Ri kōṃṃan kien (lawmakers) ro, kobaḷọk ippān ro rej jerbal ilo organization eo ej jutak kōn maroñ im jiṃwe an armej, im rutiej ro jān Mexico rej kwaḷọk bwe ej aikuj ḷapḷọk im jejjet ḷọk jekjek in jerbal kein ikijjien ta in eaar bōk jikin im bwe ren kōṃṃani im en wōnṃaanḷọk wōt elōñ ḷọk jān juon jerbal in etale ko rej bōk jikier ikijjien jorāān in.
Etke Chickin Melele eo ej bōklōñ tak bwebwenato in?
Meñe eoktak mālim eo an ri Majōl ro ñan pād ijokein iuṃwin Compact of Free Association eo, ak bwebwenato in an Lorenzo ekwaḷọk jekjekin im wāwein an rijerbal ro jān tulik in America kar kalek jukjukin pād kein ilo elōñ iiō ko ṃaantak, lale im karūttoik ḷọk baaṃle kein aer ie, im pukot juon ilju eo ebolel ñan er ilo America kein.
Ejjab menin wōt ak bwebwenato in an ḷoḷḷap in ej bar kwaḷọk bwe kōn jekjek kein rej waḷọk ñan rilikin rainin, eḷapḷọk eddo ko an ro rej jerbal ilo opij kein an consular. Consul General eo an Majōl Eldon Alik eaar jiroñ ḷọk Chickin Meḷeḷe bwe opij eo an ri Majōl kiiō ekūtkūt an loḷọk jikin kalbuuj ko an ICE ñan jipañ ri Majōl ro rej ioon abañ ko āinwōt jet rilikin.
Bwebwenato in kōmij kadiwōj waj ekāāl tata im kar etale ta ko raar waḷọk im bōk jikier, wāwein aer kar juṃae doon im buuk doon, ekijkan an bwebwenato in buñbuñ ipeḷaakin lalin, im etke eaorōk bwe ro ilo jukjukin pād ko an ri Micronesia ren jeḷā kake.
