(Bwebwenaton Jabro̦ series ej wōnmaanlok wōt) jān archive ko am Okōj 24, 2016.
Ilo bwebwenato in kōn Jabrọ, jekar lo ke ilo jinoin iiō ko an ãinwōt juon Iroijļapļap ñan Rãlik en, e ekar juon ri tōl an manit ekar kanuij eṃṃan. Aolep naan ko reṃṃan im rekar waļọk kōn e: “Jabrọ elelle rear”, “Jabrọ e iakwe armej”, “ekōṃanṃan eoon aejet,” rej jet ian naan kein im rej ri bwebwenato ro ad rej jeraki wōt rainin ñe rej jeraki bwebwenato kein kōn Jabrọ. Elōñ ian ri bwebwenato rein ekkã aer bōjrak wōt ijin im jab kwaļọk jemļọk eo im ej jab emaroñ kwaļọk ke e kar bar wōr an armej in mōjnọ.
Ekkar ñan ejja ri bwebwenato rein ad wōt, ãlkin an kar Jabrọ bōk tũb eo ilo iaekwōj eo eļap ippãn lōmaro jein, im ãlkin an kar pãlik taitōl eo an iroijļap, armej ro doon rekar kalōkļọk juon imōn eṃ aj eļap im eṃṃan.Aweej eo an ej pãd ioon juon po eutiejļọk jãn aolepãn ṃweo. Ñe ej wōr jerbal rot in ilo aelōñ in Rãlik kan, aolepãn jukjuk in pãd en ej kobaļọk im jipañ; ewōr kwonan juon eṃṃan tab im ewōr kwonan juon kōrã aj. Kōrã rej wewã ṃween ak eṃṃan rej tallōñ im kōtak; ewōr juon ak ruo jemãn aj. Ewōr adwaj epoojak ñan najidik aolep ri jerbal rein. Bōrokuk rot in ej itok jãn wōt naan in: “jimor wōdejipel ra eo buñwaj.” Ej jerbal naan in ñan aolep jerbal ko reļļap rejelōt juon jukjukin pãd ilo aelōñ ko ad im ñan rainin ej jerbal wōt ilo jet ian aelōñ ko ad. Eokwe ejjeļọk oktak kar ilo iien eo armej rein rar kalōke ṃweo imōn Jabrọ. Ijo ejjab alikkar ilo bwebwenato in, ej jab alikkar elaññe aolepãn Rãlik eaar kobaļọk ak elaññe Aelōñļapļap en wōt ãinwōt ilo iien ko rekar jodaiki ļọk Jabrọ.
Ilubwilijin kōrã ro wōj rar wewã ekar wōr juon kōrã dãeoeo, Lenkar, jet ri bwebwenato rej ba et eo juon Lenkaro. Ke kōrã in eṃṃan dedtan ej wewã im jutok aj ko kwonan bwe jemãn aj ro rej lilōñļọk ñan ri kōtak ro, lōmaro rej irere kake wōn ej lilōñļọk im aj ko liin eaar wewãiki rekar pedakilkil wōt ilaļ. Eaar etal im eawoļ likao ro rej kōtak. Ãlkin an aolep jeļã ta eo eaar bōk jikin, Jabrọ eaar bar reel ippãn Lenkar.
Ãlkin an dedeļọk ṃweo, Jabro ar jilkinļọk enaan ñan Jibke, leo pãleen Lenkar: “Etal im bōktok jourur en.” Jibke eaar jerak im bōktok jourur eo. Ej kab itōn kakkije ak bar juon enaan ej itok: “Etal im bōktok jarom en.” Ãlkin joļọk elōñ allōñ imeto, Jibke eaar bauri jarom eo im bōkļok ippãn Iroij eo an. Ãlkin jarom eo, enaan eo enaaj kar bōktok jemļọk in mour eo an Jibke eaar itok ñan e: “Jibke, etal im bōktok kōto en!” Ke eaar bwiloke tipñōl eo waan, Jibke eaar jeļã ke kajjitōk in ãliktata, ekar kanuij ben bwe kōto eo ekar ukoktak im wa eo waan ekar jab maroñ jerakļọk ñan kōto eo ak e kar jeje wōt jãn e. Eaar diak ijen im ijen ñan jibadekļọk ijo kōto eo ej itok jãn e ak e eļak kitak, joklã im itok kōto eo jãn eañ, eaar diak im mōk; ãliktata, Jabrọ ar ãñden im maro im mej.
Ke Jabro eaar lo ke Jibke eaar jab jepļaaktok, e kar jeļã ke armej in doon eṃool ñan e ekar mej. Jabro eaar pãleek Lenkar. Bwebwenato in enañin ãinwōt bwebwenato eo kōn Kiiñ Devid im juon ian ri tarinae ro an, Uraia, ri marre eo an Bathsiba im jej riiti ilo Baibōļ. Iroij in iroij ran eaar jiroñ Kiiñ Devid ke eaar lukkun jerọwiwi im “bwe jãje eo eban etal jãn ṃweo imōn Devid,” ak etke jet ri bwebwenato iMajōl rej ba Jabrọ ekar ejjeļok an jerọwiwi? Ta aṃ lōmnak?