Original print date: September 2015
Ilo Aeḷōñḷapḷap Atoll ekar kōṃṃan juon iaekwōj an joñoulruo likao. Aolep likao rein nejin juon kōrā etan in Lōktañūr. Ejjab alikkar etan jemān likao rein ak ekkar ñan ro jibwid im jimaad e kar wōr juon leddik jatin likao rein ijoke ejjab waḷọk etan ilo bwebwenato in. Ewōr jet rūtto rekar jiroñ kōj ke kōnke bwewenato in ekar jelōt wōt wāween an likao rein eọrọñ naan ko an jineer, eaar jab aorōk an waḷọk etan jemāer. Ikōtaan jeimjatin rein Tūṃur (rūttotata) im Jebrọ (diktata) ekar ḷōmarein ekkā kōjbar etaer ilo bwebwenato im kōkadede ko: Mājlep, Mejdikdik, Jitata, Jeḷeilōñ, Jeljel, Kouj, Ḷak, Ḷakmijtata, Ḷakeke, im Ḷōṇa. Ewōr jet iaan et kein ri bwebwenato ro ad rej jab erra ippan doon kaki ke rej nejin Lōktañur: Ḷōṇa, Ḷakeke, im Ḷak, ak bwebwenato in eḷap wōt an mejekḷọk Jebrọ, Tūṃur, im jineer.
Juon raan likao rein rar jek ilo burueer ñan kōṃṃane juon iaekwōj kōrkōr jān Wōja ituiōñ in Aelōñḷapḷap en ñan Je, iturōk-turear. Ak ilo tōrre in likao rein rar kōṃṃane iaekwōj in aer raar aikuij aōnōōn bwe wūljḷā ej jañin kar waḷọk i’Ṃajeḷ. Ak Ri Ṃajeḷ remeḷeḷe raar jeḷā ilo tōrre jab in ke aelōñ in Aelōñḷapḷap e kar ḷap mōlwan. Meḷeḷein men in, enaaj kar bōk elōñ raan ko ñan tōprakḷọk ilo Je. Eo enaaj kar bōk tūb eo, enaaj kar iḷọk ñan e taitōl eo an Irooj.
Ke likao rein rekar jino aōnōōn im jibadekḷọk rear, ekar alikkar jān ijjino eo ke ro redik im reṃōjṇọ re ban kar bōk tūb eo bwe eaar kanuij bat wa ko waer. Mekarta, ekar ejjeḷọk iaan likao rein joñoulruo eaar kōnan ebweer im jab kajeoñ anjọ. Jebrọ, likao eo ediktata iaan ḷōṃa rein, e kar piditetata wa eo waan.
Ak Jebrọ ewor juon men e kar pād ippān ak ejako jān ḷōṃaro jein, naan in “nejin jelkaiie,” juon eo ej eọrọñ naan in kaiñi im bokaki, im juon nejin karuk. Bwe ke likao ro rerūtto raar aōnōōn im ekar alikkar ke wa ko waer rekanuij le iṃaan, rar lo kōrā ro jineer ej jutak ioon kappe in āneo im ippān e kar juon būlakwōjkwōj ej alibanbane. Ejjejọk juon iaer e kar kōnaan bwe wa eo waan en eddo kōn men ko lellap eo jineer e kar ban kotaki. Eñin unin an armej kōnan ba: “Eḷap aṃ jeḷā eṃakūtkūt in Loktañur” in “rej ba ke eḷap an Iōñ ṃweiōṃ.
Ke juon ilọk juon e kar itōn ellāḷọk jān ijo Lōktañur ej jutak ie ioon kappe, lōllap e kar ikkūrḷọk ñan er, jino ṃoktata ippān Tūṃur: “A nejū ña ij iuwe ippaṃ!” Aolep iien e kar kwaḷọk kajjitōk in an, kajojo iaan ḷōṃaro nejin raar uwaak, “Kwōn iuwe tok ippān lōne ilik!” bwe kajojo ar lore uwaak eo an Tūṃur: “Kwōn iuwe tok ippān Mājlep” ḷeo jatin ilikin. Jebrọ wōt eaar oktak an uwaake jinen jekdoon būlakwōjkwōj in men ko ṃweien lellap eo jinen: “Eokwe iuwe tok!”
“Nejū,” lellap eo eaar ba ñan Jebrọ, “Kwōn jibwe waj kiju eo na ilo jikin im kwōre tokubaak ṇe im to ṇe iroñ, im to kane iṃaan im ilokan wa ṇe.” “Ta kein?” Jebrọ eaar ḷōmṇak. “Kiiō bwiloke wa ṇe waaṃ,” jinen ar ba, “im jirabwe wūjḷā ṇe aṃ.” Ke wa eo eaar jino ettōr, lellap eo eaar ba Jebrọ en kabwijer iieb eo an wa eo bwe en eṃṃanḷọk an ṃwijṃwij ṇo. Rojak ṃaan im rojak kōrā, lot eo, jomūr eo, im ṃōttan ko jet an kiju eo im wūjḷā eo ekar men ko jet jinen Jebrọ eaar katakini ilo aero tar malwan Aelōñḷapḷap. Kōnke e kar tōrre eo ṃoktata in e kar wōr ejerakrōk kōn wūjḷā, jemaroñ bar kōtmāne ke Lōktañur e kar barāinwōt katakin Jebrọ wāween diak im jekjek ko jet mellan wa.
Jebrọ e kar tōparḷọk Je iṃaan aolepān ḷōmaro jein, ekūtbuuj Tūṃur, ḷeo kar iṃaantata. Ke e kar ekatak ippān jinen wāween poone wūjḷā eo an, E kar jetak juon ṇoon barijet im bōk wa eo waan ñan eoon kappe in Je ippān jibañ ko an karuk eo nejin. Men in ekar kōṃṃan bwe en ejjeḷọk jenkwan neen armej im mennin mour ioon pok. Tūṃur elak kar tōprakḷọk Je, eaar ḷōmṇak ke e eo ekar bōk tūb eo. Ak ke ej ārōkeḷọk wa eo waan, Jebrọ ekar jelṃae im men in ekar kōṃṃan bwe Tūṃur en kar ekkelọk im ba naan kein: “MEJA WŌT KAPIN BŌRA!”
Emaroñ lōñ katak ko kajojo iaad renaaj bōki jān bwebwenato in, ak ñe baj ña, eokwe erkein men ko reaorōk ij loi ie: 1) Meñe Jebrọ ekar inonotata iaan ḷōṃaro nejin Lōktañur, e kar bōk tūb eo kōnke eaar bokake naan in jined kiped; 2) Naan in kaiñi ko an jined reaorōk im renaaj kōjatdik kōj; 3) Rainin ñe Tūṃur ej tak ilo lañ, jejamin lo Jebn;i bwe en kaṃool naan kein: “Meja wōt kapin bōra”; im 4) Ne jej kōjāltok bwebwenato in ñan kajojo iaad, ta ej ba ñan kōj kōn wāween ad eọrọñ jined?
Rọọlḷọk n̄an pepa https://chikinmelele.com/from-the-archives-september-23-2015/.