Happy 4th of July!! Eokwe ij jab kōjak ke eļap aō pok kiiō! Inne iaar riiti Facebook post eo an Consul General ne an Majōl ilo Springdale, AR., im men ko ej ba ilo post in an kōn Coronavirus in jidiik wōt aer oktak jān post ko an moktaļo̧k. Oktak eo: eaar quote i bōnbōn ko rekāāl jān State ne an Arkansas im kameejļo̧k lōn̄ļo̧k in armej ro ilo state in emōj aer bōk nan̄inmej in. Iaar kanuj ilbōk kōn jon̄an bōnbø̄n kein. Im iar kolmānļo̧kijen kōn jete ri Majōl eo iloan bōnbōn kein.
Elan̄n̄e ejim̧we oran ri Majōl ro rar ripoot i tok, eokwe erkiein oran unofficial confirmed positive case: Spokane, WA: 200 plus; Iowa: 15 ; Honolulu: 13 (Big Island im Oahu); Oregon: 200 plus; Guam: 29; Utah: 6; im Springdale, AR.: 300 plus. Mej: 40 plus, Ri Majōl ilo aolepān Amedka.
Mekarta lōn̄in bōnbōn kein, ak kōn tarrāre in lōmņak ad jimor wōdejipel im jumae coronavirus in ejamin emman jämlok eo an. Ra in eddo—coronavirus in—enaaj oktak im bun̄it kōj im jab japilpil ļo̧k jān kōj. Ilo jet naan jān Lainjin, maanje tata in kapen ro i’Majōl jaar bōki naan kein: “Kōm lak tartak, Leewa im Lōmtal rej jōkjōk i’wa eo jōkjōk ieedeed, LAKIELEL in e man kōj. Jej jab aikuij kōtļo̧k bwe Ra in eddo—Coronavirus in—ej juōn lakielel bwe enaaj man kōj. Lukkun ilo m̧ool eo, em̧ōj an jino man kōj ak jej kajjeon̄ kabwōjrak e.
Im kabwōjrak e kiiō eļap an ben. Ebajet? Kōnke jet ri tōl ilo jukjukin pād kein ad ri Majōl i’Amedka in rej ba “jojo pik meto” ak jet rej ba “jojo pik i’ene,” jet rej ba “kōjparok im tiljōk bwe kwōn maron̄ jipan̄ elōn̄” ak jet rej ba “jab pinej botūm n̄e kwōj itok n̄an iien ko rellap an Anij.” Consul General Alik ej ba lori guidelines ko CDC eaar litok koba ippān ko jikin kwelok Springdale em̧ōj an karōki n̄an Springdale. Jet douluul rej ba kiili imōn jar kein ad kōnke ej jan̄in tōrean kōpelloki. Ak ejja douluul kein wōt rej jab ba n̄an imōn jar ko re lak pellok kō-jem ko aer jān jinoin nan̄nmej in bwe rej aikuij kiili kōjem kein aer.
Inne e kar itok ruo enaan ilo Messenger, juōn ar itok ilo Facebook. Jān Messenger iar kōjjoe video eo eaar itok im̧ aan kōn kwalok naan eo an Ri Kaki Jetton Lōmwe jān New Grace Beginning Church, elan̄n̄e ejim̧we armej ro rar jilkintok video in n̄an n̄a ilo Messenger. Kwalo̧k naan in eaar kōm̧m̧ane ilo juōn iien kallib. Jet Ian naan ko an Ri Kaki in erkein: “Ke iar lotak, iaar jab lotak tok im ekōņak pinjān botū. Ij kwi kōn manit eo aō. Komin jab binej botūmi n̄e komjj itok n̄an iien kein rellap an Anij.”
“Eḷap aō buromij kin nan kan[e] an Ri kaki ne,” Kelly RL Bokin eaar jeje ilo Messenger.
An armej lōmņak kōn naan kein an Ri Kaki Lōme eaar initōt aer itok ilo social media im kanuij ekkan̄, Timor ilo Facebook im ilo Messenger. Erkein jet Ian lōmņak ko an Ri Kaki im Deacon ro an eklesia ko jet:
“Em̧ōj am likit bwe gospel in ej kein kōmaak”, William Gideon ar ba ilo Facebook, “En mōj ne!”
“Wōn ņe elukkun bōd an kwaļo̧k?” Takio Langkio ilo Hawaii en eaar jeje ilo Messenger.
“Elan̄n̄e armej ne emej im rej kalbwini eaar mej jān an kar jab binej botūn, innām etke Ri Kaki ne ej jab kōmour i?” Juōn ian ri kwelok ro ad ilo Nitijelā im ej bar deacon an Assembly of God eaar ba ilo post eo an ilo Messenger.
Innām eaar itok naan in kapilōk in jān Jacki Lavin ilo Messenger n̄an kōjwōj aolep: “Kien im tōmak rej ippān doon. . .kōjparok ej aikuij pād ilo mour ko ad.”
Im n̄an Ri Kaki Lome, Ri Kaki Jacki Lavin eaar kwalo̧ki naan kein: “Jabdewōt eo ej jab pokake ej jab ri jar…Kwōn kōļapḷọk eok ilo jar; kōļapļo̧k eok ilo riiti naan eo an Anij.”
Jet naan in kakkōl im inepata rar itok jān Majōl jān juōn eo eaar jijjet ilo juōn ian jea ko ilo Nitijeļā eo ad: “What a sick mind; ejaje manit im ejjab melele Bible. Emaron̄ kōmman jerata n̄an elōn̄ Dri Majōl ijene ej pād ie…”
Ilo an kwalo̧k an lōmņak kōn naan kein an Ri Kaki Lōme ilo radio pirokiraam in “Kōmōkajļo̧k Meram Eo” ippān Larry Muller im Tira Keju im Rikaki ro jet an Full Gospel Church, Rev. Ronald Matthew, eaar tōbiaaki eddo ko an kien eo kajjutak in armej im eddo ko an “citizen ro” ilo juōn laļ. Kien eo an juōn laļ, ekkar n̄an Rev. Matthew, ewōr jilu m̧wian̄ōn eddo ko an: “kōjparok aenōm̧m̧an ilo juōn jukjukin pād; kaje ro ri nana; im lelo̧k nebar n̄an jukjukin pād eo ej pokake.”
An kajojo citizen eddo er kein: kōttāik er; kile bwe kajoor otemjej rej itok jān Anij; kōllā ewōj; im men ko jet. Jouj im lale link in i’laļ kōn tarlep in naan in an Rev. Matthew:
https://m.facebook.com/story.php?story_fbid=3338745806176996&id=100001248276008&sfnsn=mo&d=n&vh=i
Naan eo emeratata ilo naan kein im ko wōj rellōn̄ ejabwe ijin n̄an jei aolep, ej itok jān Mathlynn Bano: “Em̧ōj An letok meletlet im jeļāļo̧kjen.”
Buuj aolep lōmņak kein ilo juōn wōt tūroro, Ri kaki Lōme, ej naan kein jān Laajrak in Tōmak in: “Kōmij tōmak ilo tōl an kiin̄ ro, president ro, ri pepe ro, im riekajet ro, ilo pokake, kautieje, im rejtake kien eo.”
Jen kōtļo̧k taktō rein ad bwe ren kwaļo̧k kein tariņae rot jej aikuiji n̄an jumae COVID-19 Coronavirus in. Er im ro rej kōm̧m̧an policy rekkartata n̄an tōl jar in tariņae.