Wiik eo ļo̧k jaar jemļo̧k ļo̧k ilo “jede eo moktata” im̧aan ri ekajet eo, “preliminary appearance”. Im ilo tōrre in ri ekajet eo ej kajjitōk ippam “ewi wāween am plea (akweļap)” kōn ak n̄an men eo ak men ko ruōm. Āinwōt akar kōmeleleiki ilo issue eo ļo̧k, kāālet ko am kein: guilty (kwōj errā ippān ak errā ippān men ak men ko ruōm); not guilty (kwōj jab errā ippān ak n̄an men eo an men ko ruōm); no contest (kwōj jab ba kwōj errā ak kwōj jab ba kwōj jab errā ippān an kōn men eo ak men ko ruōm); change of plea (ukōt akwelap eo am im̧aan ri ekajet eo). Change of plea e ban jerbal ilo jāde eo am moktata ilo court kōnke iien eo in ri ekajet eo ej kab lo eok im̧aan mejān im kwōj itōn kwalok uwaak eo am moktata n̄an men eo ak men ko ruōm.
Not guilty ej akwelap ak plea eo ekkā bōke ibwiljin plea kein. Em̧ool juōn ri ekajet em̧m̧an enta bar ba “em̧m̧anļo̧k n̄e kwōj bōk plea in” ilo jāde in am moktata ilo court. Elōn̄ iaad jej jeļā ta jimwe ko ad iumin Jemān Ae in an Amedka in; kōn men in, ri ekajet eo ej aikuij lale bwe jen melele men kein mokta jen an wōnm̧aanļo̧k jān “plea” n̄an bun̄tōn ko jet ilo “process” in. Barāinwōt, pedped wōt ioon men eo ak men ko ruōm (crime eo), ri ekajet eo enaaj jiron̄ eok bwe kwōn lolok juōn lawyer im naaj lelok eok n̄an opij eo an public defender. Enan̄in aolep State rej jiron̄ eok bwe kwōn etal n̄an opij eo an public defender elan̄n̄e crime eo ņa ruōm kake elapļo̧k aorōk in jān $1,500.00 im 30 raan ilo kalbuuj. Jekdoon n̄e kwo jeļā ke kwōj guilty, ak ri ekajet eo enaaj jilkinlok wōt eok n̄an opij in mokta jān an kwalok jemlok eo an case eo am.
Jejjo ri ekajet rekoņaaņ bōk plea eo am ilo iien jāde in moktata am im̧aan mejān. Ilo jekjek in, kwōj make liakeļok eok ilupiden pein ri ekajet eo bwe en kōm̧m̧ane juōn jemļok n̄an case eo, etan men in summary judgement.
Ak n̄e kwaar plea jab guilty ilo jāde eo am moktata, innām ālkin am kar iione juōn lawyer jān opij eo an public defender, im kapilōk eo an lawyer in ej bwe kwōn “ukōt” plea eo am, innām renaaj lewaj juon “change of plea form” bwe kwōn kanne im̧aan ri ekajet ro im im̧aan lawyer eo am. Ilo tōrre in, ri ekajet eo enaaj kajjitōk ippam:
Change of plea form e kwaar jaini ke?
Ewōr ke en eaar kipel eok bwe kwōn jaini;
Ewōr ke jabdewōt men kar kalimmuri ke naaj lewōj n̄an eok n̄e kwo jaini pepa e?
Ealikkar ke lōmņak ak am kōlmāmļo̧kijen jibon̄ niin?
Kwaar ke bōki uno ko rekkajoor mokta jān am jāde im̧aan jikin ekajet in?
Ebun̄ ke buruōm kōn lawyer ne am im kapilōk ko ikkijien kakien eaar liwaj n̄an kwe?
Kwo jeļā ke juōn ian jim̧we ko am ej n̄an etal n̄an juōn jury trial? Im bwe jury ej 12 armej jān jukjukin pād in naaj kobaik tok er bwe ren etale im naaj kar kwalok jemlok eo an case in am?
Ilo iien ekajet lawyer eo ej liakelok eok (prosecutor) n̄an ekajet enaaj kajitikin eok im maron̄ bōktok ri kam̧ool ņae eok? Im bwe im lawyer ne am komro maron̄ kajitikin ri kam̧ool ro prosecutor eo enaaj bōktok er?
Kwo jeļā ke ej am jim̧we men in n̄an ikōn̄ elan̄n̄e kwōj koņaaņ?
Kwo jeļā ke change of plea in ij jab “party” n̄an e? Bwe ejjelok aō, āinwōt juōn ri ekajet ie?
Ak kememej bwe ewōr oktak ikōtaan plea hearing sequence eo an misdemeanor im felony charge. Felony charge elapļo̧k kaje ko ie jān ko ilo juōn misdemeanor charge. Wāween an bōk jikin plea hearing en̄in:
Jen ba emōj an pilijmāān ro jibwe eok kōn misdeamenor ak felony charge. District attorney eo ej kiiō lale elan̄n̄e men ko ņa ruōm kaki enaaj bōkiļo̧k im̧aan jikin ekajet, innām ej jino an jikin ekajet wōnm̧aanļo̧k (proceedings) an jerbale case eo am. Elan̄n̄e rar ņa ruōm kōn juōn felony, enaaj wōr juōn am preliminary hearing, im, elan̄n̄e kwo kwalok uwaak eo am kōn men eo ak men ko ņa ruōm kaki, innām naaj arraign i eok.
N̄an misdemeanor, kwo naaj aikuij kwalok plea eo am. EJJELOK am jimw̧e n̄an preliminary hearing ilo juōn misdemeanor case. N̄an felony case ko, ālkin wōt arraignment, case eo am enaaj kiiō etal n̄an status conference, ijo naaj ekonono kake case eo im lale elan̄n̄e kwo maron̄ lo mejlan im jab etal n̄an trial ak ekajet. Elan̄n̄e kwōj errā n̄an juōn kooņ, innām kwo naaj kwalok plea eo am im̧aan ri ekajet eo.
Kememej barāinwōt, bwe kwōn ekonono kake ippān lawyer eo am oktak eo ikōtaan plea hearing im plea bargain. N̄an kwalok tu kadu in, plea hearing ej juōn iien ron̄jake ej kōm̧m̧an im̧aan juōn ri ekajet; plea bargain ej ekkonono ko (negotiations) ikōta-an prosecutor eo im defense attorney eo.
Naan in kakkōl: Mokta jān am errā n̄an juōn kooņ, ekkonono kake ewi wāween an jelōt eok im case eo am ippān lawyer eo am. Armej eo in kwōj tipdiki lōmņak ko ak en̄jake ko am n̄an e kōn case eo am. Eaorōk barāinwōt bwe en lukkun jejjet am mejallepe case eo am n̄an lawyer eo am bwe en ejaake “jojomar eo am” ilo case eo. Elan̄n̄e kwaar ņooje juōn men ilo case eo am im lawyer eo ej liakeļo̧k eok e lelōn̄tak ilo court, men in enaaj kanooj meej ilo lōmņak eo an ri ekajet im naaj juōn men enana n̄an case eo am.
Kememej barāinwōt: Kwōj JAB aikuij ekkonono ilo court; unin an wōr am lawyer ej n̄an ekkonono n̄an kwe. Men ko kwōj ba, remaron̄ kōjerbali ņae eok ilo case eo am. Ewōr iien ilo case eo, ri ekajet eo enaaj kajjitōk elan̄n̄e ewōr jabdewōr kwōj koņaņ ba. Joke, bar juōn alen, mokta jān am ekkonono, jekdoon n̄e kwo lukkun kōņaņ ilo lōmņak eo am, lale mokta ippān lawyer eo am.
Ak āinwōt aō kar ba jinoin, enan̄n aolep case kein ad Ri Majōl rej jarjartok jān kadōk im traffic violation. Ijo jej aolep lōmņake in.
JOJO KŌJPAROKE!!!