01 Julae 2020, Salt Lake City, Utah: Ilo juōn emakit Ri Majōl ro ilo jukjukin pād eo an Ri Majōl ilo Salt Lake valley rej kab jeļā kake, juōn leta jān Pacific Islanders Health Coalition (PIHC) kar je ilo Juwūn 10, 2020 im etal jān douluul in n̄an Presidency eo Kein Kajuōn an Kabun̄ eo an Jisōs Kraisr im Armej ro Rekwōjarjar ilo Raan Ko Āliktata. Leta in eaar kwalok kapeel ko an rein ilo douluul in im kwalok aer kōņaaņ kabōjrak ajedeed in coronavirus.
Ekkar n̄an léta in, kōnke ejelok an ri tōl ro an eklesia in edoomtata ilo Utah, imenene im training ikkijien ājmour, ak ewōr ippā rein rar jaini leta in, rar kwalok aer kōņaan jipan̄, bwe “ewōr aer imenene in kōmmani jerbal kein ikkijien ājmour.” Ijellokin men in, armej rein ilo PIHC rar jaini leta ilo etan aolep Ri Samoa, aolep Ri Tonga im aolep Ri Majōl, rar kwalok aer inepata kōn an eklesia in kar lōmņak in kōpellok imōn jar ko an n̄an bar kabun-jar weekend eo kiiō. Douluul eo an Ri Majōl im juōn tab joorlep ko an PIHC etan Utah Marshallese Association (UMA), President eo an ej Cassidy Matthew, Susan Alik Chong Gum, im Kathy Matthew rar jaini leta in n̄an Ri Majōl.
Armej ro kiiō rej pād ilo PIHC rej Ri Samoa, Ri Tonga, im Ri Majōl. Jacob Fitsemanu, juōn emmaan in Tonga im bar juōn councilman ilo West Valley City, juōn jikin kwelok itulaļ turilikin Salt Lake City, capitol eo an Bukwōn in Utah, ej tōl PIHC.
Ak ilo kar juōn telephone survey n̄an lale lōmņak ko an ro uwaan eklesia in, 100% baamle ko kar ekkonono ippāer rar ba ke rejan̄in kar lo leta in Bishop Tefred Debrum, likao eo ej lale Granger 5th Marshallese Ward, ijo ewōr jilubukwi jima ri Majōl rej jar ie, eaar ba elak kar lo leta in im Susan Alik Chong Gum eaar jilkinlok n̄an e ilo email, emōj an kar dedelok an post ilo Facebook. E bar lōn̄ jet ri tōl mōttan Bishop Debrum rejjan̄in lo leta in emōj jaini ilo etaer. Ri tel ro an eklesia ko jet an Ri Majōl rejjan̄in bar lo leta in barāinwōt.
Ilo lukkuun m̧ool eo, Presidency eo Kein Kajuōn an Kabun̄ eo an Jisōs Kraisr im Armej ro Rekwōjarjar ilo Raan Ko PreĀliktata eaar kili imōn jar ko an ijoko rekkar ipeļaakin laļ in, n̄an aolep makitkit, ekoba kabun̄-jar ilo raan in Jabōt kōn wōt aer kar inepata kōn coronavirus in ilo jinoin Eprōl eo, mekarta n̄e juōn ian kwelok ko an rellap kōmmani ruo alen iiō otemjej ej bōk jikin ilo wiik ne imaan ilo allōn̄ jab ne. Ilo tōrre ne kwelok in ekkā kadieojļo̧k ilo mejatoto ilo 97 kajin n̄an laļ in eaar kōmman ilo jiljino wōt kajin; kajin Majōl eaar delon̄ iloan kaiōtiōtļo̧k ko, jān wōt an ri tōl rein kautiej i guideline ko an Centers for Disease Control’s (CDC) ikkijien social distancing. N̄an rainin imōn jar kein rejjan̄in pellok n̄an jar im makitkit ko jet ekkā kōmmani aolep wiik. Guideline ko lilok n̄an bishop rein jān Presidency eo Kein Kajuōn rar etal n̄an er wōt jilu ak emān allōn̄ remootlok im aolep wiik bishop rein rej karon̄ ri jar ro aer ta ej im enaaj bōk jikin, juōn jekjek ejjelok kajidede ie kōn ta eo ri tōl rein rej ba im kōtōmāne ke armej rein rej ron̄ jake im loore.
Ak leta in an PIHC emōj an kājoone, im ilo juōn wāween katje tokjān maron̄ eo lelok ioon local leaders ro (bishops im stake president ro). Ilubwilijin ro rar kwalok aer jumae leta in an PIHC, eaar juōn Ri Tonga ej Stake President. Ilo ekkar ko ilo eklesia in, juōn ward ewōr juōn bishop ej tōl e. Jiljino lok n̄an ruwalitōk ward ej ejaake juon Stake, eo im ewōr juōn Stake President ej tōl e. Melelein men in, emaron lōn̄ ļo̧ k jān jilu to̧ ujin ri Tonga rej rie Stake President in aer.
Āliktata ilo n̄ūrbōktak ko an ri Majōl ro ekkonono ippāer kōn leta in ekijon̄ im elap an mweiur ro uwaan eklesia in kake, rar ba PIHC en kar jab kapilōke ri tōl ro aer ilōn̄tata. Jet rar kwalokn kajjitōk in: “Etke Utah Marshallese Association (UMA) e ban kar make jerbal ippān Ri Majōl?” Uwaak eo aō makmake: “Ittā bin lajidi! Lale ippān UMA.”