28 Jānwōde, 2021. Salt Lake City, UT.:  Bōlen kōn an naan in kōkajkaj walok ilo mejatoto eo an tōrre eo ej walok ie, ej jab ekkā kōjerbale ilo bar juōn tōrre.  Ak bōlen kōkajkaj en eaar walok ilo 70 ko eban jerbal n̄an 80 ko, im iiō kein liktak; ijjab jab jeļā im ijjab riab ke ijjab melele etke.  Un ko de kein imaron̄ lōmņaki.  Ak elan̄n̄e jōjkab dāpiji wōt emaron̄ jako jidikin bwebwenaton wāween an ukooktak im eddōkļo̧k kajin Majōl.

N̄an wanjon̄ok, wōn iaad ej kememej kōkajkaj in “atta mula”? Eaar kanuij ļap kōjerbale kōkajkaj in ilo 70 ko.  Melelein: “ij kōjak bajjōk”; “ij ijkure bajjōk;” “ij moņe eok” ak imōņōņō in ba ijjab ņo̧o̧je.  Rainiin n̄e kwo kōjerbale kōkajkaj in renaaj lōmņak kwaar joktok jān Jeljelin Kouj ruo awa emootļo̧k.

“Aaet atta” iaar ron̄ i’Kibinmeto kan.  Ak rōlak kōjerbale ilo aer bwebwenato melelein “lukkuun m̧ool, ejjelok perre.”  Im rūtton aelōn̄ in kibinmeto kan rej kōjerbale kōkajkaj in n̄an rainiin ak pepene in rainiin renan̄in “jab ļo̧k wōt n̄an jidik.”  Ijo wōt ke, rūtto rein rōlak kōjerbale ekkā am ron̄ aer ba “bwe bōta men eo eo.”  Ebajeet?  Ijaje; bōlen n̄an kapen bwebwenato en aer.  Jemaron̄ bōlen ba kōkajkaj in eaar jebar jān aelōn̄ in Metwan Tiltak Kan.

“Aaia” men̄e jej kōjerbale wōt rainiin n̄an kwalok ad bwilōn̄ im jab errā jimor, epepen kein reddik rejjab im ijaje rejeļā ke melelein ak wāween kōjerbal e ilo ekkonono.  Iaar kanuij ilbōk im mōņōņō jimor ke juōn ripālle eaar kōjerbale ke eaar jab jejjōt an den̄ōt juōn ball ilo jikin tennis en i’Uliga jet iiō remootļo̧k.

Juōn iien juōn pilijmāān eaar lukwarkware juōn ri ko̧o̧t bao ak ej lamōj ļok ilokan ri nana in: “kwōj ko ak kwo po!”  Ilak erre likļo̧k n̄an men in melele eo an pilijmāān eo n̄an deacon eo en kar jab ko̧o̧t “kwōj ko n̄an ia ke aelōn̄ jidikdik men in.?”  Ke ta?—“kwon ko jidik iien ak kwo po ilo kien in eklesia jimor.”  Jabōt eo raar droorļo̧k deacon eo jān eklesia eo an im ri ekajet eo an aelōn̄ in eaar je jidik būlāwit, katotoik i’kenwaan, im kōetaltal e iloan ial leplep eo i’aelōn̄ eo kōn naan kein ioon būlāwit eo:  “Ij kalbuuj bwe iaar ko̧o̧t bao.”  Ke Truck Islander eaar jeblaak jān aelōn̄ in, ejjeļo̧k ar jeļlā ewi wāween an kar ri ko̧o̧t im iuwe n̄an Ebjā—ejjelok nuknuk, ejjelok teak, eaar jab dedeļo̧k kaje eo an im ejjan̄in bar rool n̄an lāmoren in an.  Ak n̄e kom kōņaaņ jeļā, eokwe aaet, ek koukeļo̧k wōt armej.

Im elan̄n̄e kwo naaj lolok aelōn̄ in rālik eoļap kan lale kwaar ilu n̄e rōba n̄an kwe “kabūm.”  Rej jab ba kwōn lale tu jab ņe ilo ānbwinūm; rej ba “kwōn jan itōn moņe eō.”  Rūtto im ajiri jimor rej kōjerbale naan in ilo aer emmao ippān doon āinwōt an ri aelōn̄ ko jet ba “aaia!” ak “mōjab bōrami dak.”  Bwe eaar itok juōn “dak” jān ia bwe eb pād ilo naan in bwilōn̄ in an ri Ratak?

Lale kōkō ņe!”  Juōn lōlļap in Ratak ekar lamōj jān ioon bumbum in kōkaboor eo.  Eaar jab kōnājneje lōlļap ro im likao ro nejeir rej pād ilojet iturin bumbum eo ak eaar kakkōl er bwe ren lale pako eo ej jepoole er in itōn bōki kaboor ko ippāer.  Men eo ekōjak eo aolepān ri kōkaboor ro im̧aan pako eo raar jab lōmņake pako eo bwe rōbwiden ettōn̄ —jet rōbaj mallon̄ kōn aer kar ettōn̄ im leea kōn naan in eaar kāāl aer ron̄.

“Foody” ke “booty”?  “Eokwe ibaj jaje”—wōn ej jab ba jejjōt in jipeel e naan in ej “footy”?  Ijaje emōkaj ba ak ebat jipeel e im kwalok melelein.  Naan in iaar ron̄ ilo juōn kemem ilo Ala Moana Beach Park ilo 2000 ko.  Ij lōmņak eaar jebar jān naan in In̄lij in “food” im n̄e kwōj ba leen e “foody” kwōj ba ejjab emōn̄ān̄e wōt ak ebūroklep.  Ejjab elaajrak ijin kōnke jej itōn melokloke, ak āinwōtnkōkajkaj in “atta mula” kōtmāne eo in ke enaaj jako jān kajin in ad āinwōt naan kein jet ijin elan̄n̄e ejab pād ilo laajrak in.