03 Pābwōde 2021, Salt Lake City, UT.:   Wiik eo ļo̧k jaar kōlaajraki jet ian kōkajkaj im jabōn Kennan ko rej itōn jako jān kajin Majōl kōn wōt ad kōjerbali ilo wōt tōrre ko aer im jet eokwe eļap an alikkar ke jej jab jeļā wāween kōjerbali ilo jantōj im ilo ekkonono. Ijin kiiō je kar bar bōktok jet n̄an kakemejmej kom kaki.

Ilo aolep allōn̄ kein m̧aantak jān jinoin ad jeje kōn COVID-19, je kar kōjerbale naan in lakielel.  Naan in Lainjin, kapen eo eļap bwebwenato kake ilo aelōn̄ in Majōl eaar kōjerbale ilo Ikid Eo An Lainjin:

            “Kōm lak tartak kōm lo Laede im Lan̄ni;

            Rej rooj kasjo an māāl im jekjek i’wa eo jekjek iedeed.

            LAKIELEL in e man kōj.”

Ilo wāween an Lainjin kōjerbale ijin, ealikkar ke naan in ewōr melele in ie ke ej juōn men e maron̄ man kōj, e lāj. Ta in? Nan̄inmej ke—ke juōn māāl?  Ijaje ak ej man kōj.  Jej jab ron̄ kōjerbale nqqn in rainiin, ijellokin wōt n̄e kwōj ron̄jake an kapen rane ad i’Majōl geraak Ikid eo an Lainjin.”  N̄e kapen rein re jab katakin kōj wāween kōjerbale im tu m̧wilaļ in, n̄an kōlapļo̧k melele jidik in an Lainjin, naan in enaaj bar jakjoļo̧k ippāer ilo lōb.  Enana wōt.

“Mejmej karuo” ekkā an kumi in kōjan̄jan̄ kane i’Majōl kōjerbale ilo al kane aer.  Naan in kapilōk men in n̄an an juōn armej kanuij kōjparok an emakitkit bwe jorrāān an mennin kakkure ko ren jab bun̄it I. Ejjan̄in jako jān kajin in ad ak ejejaļo̧k an pepene kein i’laļ kōjerbale.

“Ju ele” jej jab kanuij jeļā ej jerbal ke wōt n̄an ejerakrōk.  Ak jej lo naan in ilo juon al taitōl eo an ej “Kijpāpinuwe,” ekkōn in Len̄itwa Jeik. Ilo eoon 2 in al in, rikkōn eaar jei naan kein:

            “E jok babbūb ei,

            Ej ju ele bw

een lōn̄jak tok im̧aan,

            Ān ne ļe, ān ne le ‘em raan ian;

            Juk ae, dibuk, ae, jelatlat ae.”

                                    —Kijpāpinuwe: jān Len̄itwa Jeik

Jemaron̄ eņo̧iki bwe tōrre eoon in ej ba kake em̧ōj an kāān aelōn̄ ņe jino jādetok ioon lojet bwe ealikkart ke em̧ōj an “jok babbūb eo”, ak dān en iloan wa en im dān in ej emakitkit jān kein wa en ituloa jān rātem n̄an kōja āinwōt an juōn babbūb jokadikdik ilo kōto em̧m̧an jon̄an.  Ebajet ke jej ba men in?  Kōnke juōn babbūb ejjab ekkāke ilo kōto, lan̄ ak kior ko relļap.  Ippān melele in, jejjab ellolo an babbūb ekāke ilukolāpān lometo.  Ak jejeļā ke dān en iloan waļap en rej ba “babbūb.”

Em̧ōj ad kar kōjerbali jabōn Kennan kein moktaļo̧k: jalimar jab un̄ar, atann̄ij, wōjej iou jemour, p̄a em̧m̧an kabjere, ieb in unōk, waan kemem, alele, im bar jet. Ak kom nan̄in ke ron̄ naan in “okinpadre”.  Ekkar n̄an melele ko bōki jān Arronto, naan in lōllap ro jemād im jimaad rekōn jerbal n̄an ākutwōt kwobban teaaj kan im̧aan ob (wharf) rekar bōktok naan in jāan naan in In̄lij ne “working party” innām ukōtļo̧k jidik bwe en jab juōn collective noun.  Je lak ron̄ kōjerbale kiiō rej ba “iaar okinpadre wiik eo kiiō im elukkuun metal ānbwinnū.”  Juōn wōt armej ilo melele in. 

Bar jet kōkajkaj in raan kein:  jet (jab?) back, bōk wōt ran, kwo jaam drunk, kwo jaam ba, em̧ōj aō jaje, kwo lak lale, jab mōk ba, aibabbab wōt, kōttar ta, kōjare kōjare, ko bōr broke (go for broke), ekkōlōk,

Armej rot eņ eļap an kiki im mājurlep em̧ōj an rūtto ro ad keidi n̄an juōn jipenpen ilo jabōn Kennan in “kikiin jipenpen.”  Ejjeļo̧k “kikiin jipenpen” juōn em̧m̧aan rot ņe rej ba “mōmman in kaimōk raan” bwe ej jerkak im peļļo̧k wōt in jimarok; e eņ ej “imōk” raan en bwe eņ ruj; ejjab raan ej “imōk” e—lukkuun kāien em̧m̧aan.

Ewōr juōn eon̄ōd etan “mōn peļļo̧k”.  Ekkā kōm̧m̧ane eon̄ōd in kōn kōrkōr. Eo eņ am ejjab eddo bwe kōnke ek ņe mōn ejjab kanuij ekkōt; ijokwe jān iien n̄an iien ej bar mōn̄a ek ļap ak kwōj moor m̧aan akkin karuk. Ejjab m̧ōkaj am aōņōōņ.  Jet ri eon̄ō rej kōm̧m̧an bwe en ruo m̧aan eo en aer. Re lak tōpe tok juōn m̧aan, rō doorļo̧k eņ juōn im n̄e ej mōn̄ā elukkuun m̧ōkaj aer eon̄ōd.  Ak naan in n̄e kōjerbale i’āne, eokwe melele eo an “ikirumwij.”

Bween en ijjino juōn inon̄ jibwid im jimaad rekōn ba “kilin wōt ne,” kilō ejjeļo̧k ekkeroro bwe ej itōn ijjino inon̄ en.  Rekōn lak kōjemļo̧ke inon̄ en aer rōkōjerbal kōkajkaj in:  “jinimnon̄-jinem jedu” ippān naan kein “Rad dibin wūt en ilik, kōmramrōm tok aō ino̧n̄, flag en an ri Amedka itōm ejopālpel imejān ajiri rein im kaki er; flag en an ri Majōl…” Ilo al en an Dikinwūt kōn Inedrel, naan kein rej walok ijemlok in tata al ņe, innām kōjemļo̧k kōn “ejja bwe in bon̄ bon̄ bwe e ran.  Em̧m̧an wōt karkan naan kein ilo in im ej kwaļo̧k juōn bwebwenato in jebar jān aelōn̄ in Ebon im ekabiromōjmōj.

Eokwe ejjan̄in m̧aat…Wiik in laļ jenaaj bar bōktok jet bwe komin lale ekkar ke bwe ren jako jān ad ekkonono.  Mae wiik in laļ, jouj im kōjparok eok jān “lakielel” ejjan̄n jemļo̧k an man kōj. Onaake eok jan COVID-19 ilo am kōņak men ko pinjān lo̧n̄iūm im bo̧tū,; ettoļo̧k jān armej diktata jiljino ne, im en ekutkut am kwale peiūm.  Jab meloklok in kōjerbal HAND SANITIZER!!!