SALT LAKE CITY, UT—Wiik ko ļo̧k jaar kōjemļo̧k column in kōn naan in “anen etao.”  Kōnke jej watōk bwe kōkajkaj im jabōn kennaan kein jaar jei ijin reaorōk n̄an kajin Majōl im enaaj juōn likjap ļapļap elan̄n̄e rejako jān kajin in ad, je kar jino likiti ijin n̄an kakemejmej kōjwōj kaki.  Ilo juōn wāween ba, men in jej kōm̧m̧ane ijin ej juōn “kiddid kwōjkwōj.”  Eokwe “e kiddid kwōjkwōj”—e naanetok jukjukin pād in ad, jouj im etale laajrak in ilo Mōttan 7 in.

Naan eo ekkā ad ron̄ kōjerbale n̄an naan in “anen etao” ilo kajin In̄lij ej “dizzy” ak “dizziness”; ijoke, elan̄n̄e ewōr naan ilo kajin Majōl emman ļo̧k jān naan in anen etao im meleleen wōt naan in dizzy, jouj im jilkintok n̄an monkaruk10@gmail.com bwe jen kōjerbale. 

Jej ijjino ilo ad kakememej doon kōn naan in āinwōt eļap wōt an itōn kōkajkaj jān jabōn kennaan im je kar kōjerbale ilo Mōttan 1:  “atinojoiki im dijoiki”.  Naan in je kar ron̄ an lōlļap in Aronto kōjerbale.  Melele eo an “dilaiki im baniji” bwe en lukkuun pen im jab ebbolool.  Ippān naan in Aronto eaar litok kōkajkaj (jabōn kennaan?) in etto kein n̄an unin tel ko an RMI Environmental Protection Agency bwe en kōjerbali ilo kōttōppar ko an ikkijien kōjparok peļaak eo an Majōl:

“Kōmo̧mo̧ ‘em jokāālet” im “jab jek unin belle.”  Mo̧ em̧ōj āliji ilo naan in kamo̧mo̧. Mo̧ meleleen jab kōmmane ak etal iturun. Mo̧ ej bar jerbal n̄an lārooj kan ak bwidej ak ijoko kōjeno̧lo̧ki bwe rej jikin irooj.  Kōmo̧ ewōr naan in bōprae im naan in bwinimjaad ak ilo kajin In̄lij ej prohibit. Jokāālet meleleen ekkāleel.  Kiiō kobaiki naan ippān “jab jek unin belle im enaaj alikkar m̧wilaļ in naan kein. Belle ej itok jān mar ņe marbelle. N̄e kwōj rarō im “kwalok” bwidej eņ am, kwōj joļo̧j mar bwe eņ majaaj.  Jet iien kwōj jekiļo̧k mar ko retour, āinwōt marbelle. Ak marbelle eņ enaaj bar eddōk im kattoon mejam elan̄n̄e kwaar jab jek unin.  Ealikkar kiiō ke meleleen naan kein ruo ej ilo am eon̄ōd kwōj “jokāāleti” ek ko rej jab likibia bwe en jab “lot” ek en.  Bārāinwōt n̄e kwōj kōbaru, kwōj bōk wōt kom̧aan bwe en finde wōt an lotaktok baru.

Ak e bar wōr juōn naan iaar kememej e ke iaar bōk juōn aō cooler in ek jān Majōl e kar obrak kōn mōn.  Ak mōn kein jon̄an aer iddik, iar jaje wāween kōmatti.  Naan eo ekkā an lōlļap ro jimmaō kar kōjerbale n̄an eo̧n̄o̧detok ek jiddik kein, āinwōt mōn kein ilo cooler in, ej “jab kūnbit.”  Kwo lak kūnbit, kwōj eo̧n̄o̧di ek jiddik ko renaaj kar kemom epepen in ek ko i’laļ, melele eo em̧ōj am man elōn̄ epepen i’laļ in ek en edik kwaar man e.

Ak kwaar ron̄ ke aer kōjerbale jabōn kennaan in “jumejmej e manit eo” ilo al kane raan kein? Ijjab jeļā etan ri al ro iar ron̄ aer al kōn al in: 

            “komool jimma kōn bun̄tōn ne ko neem,

            rar dumej e im juren manit in ad…

            O jen “jumejmeje měnit eo…”

                                    Jan:  Soundcloud

                                    Ri ekkōn im ri al: ejjab alikkar

                                    Yiiō eo eaar walok al in:  jej jab jeļā

Ewōr naan in “emmej”. (Erre im jab kiki) ilo naan in jumejmej. N̄e jej ekkonono kōn wa, armej ran rej jab kiki bwe rej ewmmejraake wa en ioon lojet ilo an ejerakrōk ej lōmaran jilu im ekkā ba etaer “mōmmaan wōt jilu eo ibwin Eb”—kapen en, leen ilo lem en, im leen ej kabjer web en.  Ak ilo al emanmōn in, ri al rein rejjab ekkonono kōn wa ak rej al kōn aorōk in jab kiki kōn ak jān manit in ad.  Rej al im kakememej kōjwōj ri Majōl bwe eddo in emmejraake manit in ad ej an aolep ri Majōl eddo.  Ak wōn ro rej kapen ilo jerbal in emmejraake manit in ad?  Ak eņ, Irooj eņ im jooelep kan an. Wōn ran?  Ilo aō lōmņak aolep maron̄ kaņ ioon bwidej, aolepān armej rein rekōn mōttan “Nitijeļā” eo an Irooj ro ad etto.  Rainiin, Nitijeļā in ad ekkā an jerbali kakien ko im jidik wōt manit.

Ak ewi wāween am kar ron̄ aer kōjerbale naan in “det in” ilo ekkonono ko kwaar ron̄ kiiō epaak?  Kwaar ron̄ ke aer kajjitōk: “Ta le ewōr det in ajiri rane nejin leo erūtto ippān jemāer ņe edik?  Det ej jerbal n̄an meram in al.  Jet iien kwo naaj bar ron̄ aer ba “eaar pelo̧k kōn ajiri ran nejin leo jein.  Ilo melele in ilokan, lein edik jān lukken jemān ajiri rein e ban kōm̧m̧ane juōn men e kar kōņaan kōmmane bwe ej kautiej ajiri rein nejin leo jein—ak ewōr “det in” ajiri rein ippān.

Inne likao in ekōņaaņ bōk kwoņaaņ ilo naan kein jej jei, Haines Jeik, eaar letok juōn kōkadede eļap wōt an kōkajkaj jān an naan in jabōn kennaan, im eaar kwaloktok wāween ad je:  “Kwōj itok ke? Kwōj jab!  Itok in, kwo naaj kanuij bwilōn̄ kake bwe ejjab melele eo an “itok ijo”.  Ak naan in eaar jebar jān jān iiōk in pilawā ikuood kāre ippān jabdewōt jālele. Melele eo, ekkar n̄an Mr. Jeik, kwo lak ron̄ ke iiōk en ej deltok-irōk ippān pilawā, kwo ba n̄a e waj bwe enno̧.  Ak n̄e pilawā kāre ippān jukkwe enana ippam, kiiō enaaj mōkaj im elaaj am ba ”Kwōj jab!”

Juōn jabōn kennaan elukkuun m̧wilal melele eo an ak ejjab pen kili im kememej e ej “jab ino jeiklo̧k.”  Ilo tipn̄ōl im kōrkōr kaņe waad elōn kain ino ko rej booje rā kan im kie kan bwe wa eņ likieo im marom erom juōn wa.  Ino in jojo eņ eoktak jān eam kaņ, im e bar oktak wāween eoti ino kein.  N̄e e bōd eoti ino kein im kajjojo ejjab kōmmane unin eoeo eo an, ij lōmņak ijo in ewōr ino jeiklo̧k ie in.  Men̄e ino ekkā kōjerbale n̄an em im wa, āinwōt ad loe ijin, ak melele eo an emaron̄ jerbal n̄an jekjek otemjej ilo mour ko ad ri Majōl. 

Ak n̄e rej ba “jab ino jeiklo̧k bwe mej im mour eo ņe” ak n̄e rej ba “jab ino jeiklo̧k bwe enaaj wōr jerata” kiiō ealikkarļo̧k aorōk eo an kōkadede in. Kwōj lo ke?  Kōn men in, “jojo kōjparoke” wōt jab ino jeiklo̧k ak kwōn jumemej ioon wa in waadro im kadkad joor ilo am kūkki im dāpij manit in ad.

Kwōj lo ke an lōn̄ jabōn kennaan em̧ōj kar an rūtto ro ad kōteebi tok jān tipn̄ōl kaņ waad im karōki tok n̄an manit in ad ioon āne emōrā?  Bar juōn naan in rōjan̄ jān wa eņ ej “jede ak eo.” Je ban bar kōmeleleiki naan in ijin bwe em̧ōj kar tepiaake mokta ļo̧k, ak jej kakememej wōt doon kake ijin.

“E aeto, e aetak, e aetinwōn mej” ej bar juōn naan in wa ak ejerakrōk im lojet ekkā am ron̄ rooje im al kake.  N̄an wanjon̄o̧k:

                        “. . .E aeto, e aetak, e aetinwōn mej,

                        Kūkki dāpij kooj ņe,

                        Likiti ko mantin jejerakrōk,

                        Joor ioon wa e.”

                        Jān:  Soundcloud

                        Taitōl:  “Aelōn̄ Eo Ņe Im̧aan,” attr.  to Irooj Jurelang Zedkaia

                        Iiō:  ejjab alikkar

Ta meleleen naan in?  Ij lukkuun mool ke ijaje, jouj im kajjitōk ippā kapen raņe ad rainiin mokta jān aer kiil ļo̧k mājāer.  Lo kom wiik in laļ!