Jān archive ko am Oktoba 2, 2016.

Michael Beasha ej juon Junior ilo High School eo ekadu im erreo mwijbar eo an, juon eo ej 17 an iiō im ej kōn̗ak jōōt in Hawaii im Air Jordan basketball sneaker ko. Leddik eo jatin eo eoktak l̗ok jidik jān e, Maillie Beasha ej juon Sophomore, 15 an iiō im ekanooj itok-limo in ilo nuknuk ko emm̗anl̗o̗k teil̗a ko aer n̄e konaj lale l̗ok oktak in jān laddik eo jein. Paotok in Michael im Maillie jim̗or ej āinwōt eo an jo̗dikdik in Majel ro jet ipel̗aakin Amedka in. Ekanooj in em̗m̗an Kajin English ko aero jim̗or ilo aero būni wōnm̗aanl̗ok ko aero ilo kilaj im ion court in basketball eo. Kwōj aikuj ikkun kāron̄jake bwe kwōn kile ainikien ri-M̗ajel̗ eo ilo aero kōnono, juon iaan jolet ko jān mour eo mokta ilo Majel̗. Kapijuknen eo aero ekkā an obrak kōn ri-lotok, ro jera er im nukwi er. Riboot kaat ko ej kallikkar bwe Michael ej 3.1 GPA im n̄an Maillie, 3.6 GPA. Kilaaj eo em̗m̗an tata ippān Michael ej English bwe eitok limo in ilo riit im jeje. Eoktak n̄an Maillie bwe emm̗an ippān Math bwe epen. Maillie ej ba, “n̄e ejjel̗ok pen ilo juon men, koban wōnm̗aanl̗o̗k.”

Ilo ion basketball court eo ajri rein rōjel̗ā ikkure. Michael ej ikkure āinwōt juon point guard n̄an kumi in basketball eo an laddik ippān Har-Ber Wildcats im leddik eo jatin, Maillie ej juon shooting guard n̄an kumi in basketball eo an leddik ippān Har-ber Wildcats. Michael im Maillie ej jet ro rōkōn̗̗aan pād ilōn̄ tata ilo jabdewōt men eo rej wōjake. Ilo jem̗l̗o̗k in men otemjej, Maillie ej ba bwe jiāe in ikōtaan jeim̗ jati ej itok jān aero epaake iiō kein aero n̄an doon. Maillie im Michael raar jolete io̗kwe in aero n̄an ikkure ko jān jine ero im jemā ero. Jine ero ear juon rukkure ilo tōre ko ear dik wōt. Ear juon eo ej ikkure elōn̄ kain sport ko āinwōt Volleyball, Softball im Basketball ilo Majel̗ im jemāer, Mike Beasha ej ikkure wōt softball āinwōt juon pijja im ej juon iaan ro rō-tijem̗l̗o̗k tata ilo jukjukun pād in an ri-M̗ajel̗ ilo Northwest Arkansas. Ear ikkure ilo kumi in ikkure eo jān Majel̗ n̄an Micronesian Games ko. Im elukkuun alikkar itu ia in Michael im Maillie raar jolete jel̗ā in aero jān e.

Jeim̗ jati rein rej kōn̗aan pukot jel̗āl̗o̗kjen̗ ilo jikuul̗ ko ilōn̄ l̗ok. Ewōr an Maillie kōn̗aan jikuul̗̗ ilo World Evangelism College eo ilo bukwōn in Baton Rouge Louisiana im ekkatak Business Administration. Michael ej l̗ōmn̗ake l̗̗ok an maron̄ ilok n̄an Brigham Young University-Hawaii n̄an ekkatak Business Marketing. Naan in rōjan̄ē eo aero n̄an ri-jikuul̗̗̗ ro rōdik l̗ok jān Majel̗ im rōnaaj rūttōl̗̄o̗k ilo Springdale ej bwe ren io̗kwe Anij m̗oktata im bwe ren ettā̄. Kom̗ maron̄ lo Maillie im Michael ilo game ko an leddik ak laddik jān kum̗i in ikure ko an leddik im laddik jān Har-Ber High. Maillie im Michael ej jet ro rej waan jon̄o̗k n̄an jukjukun pād in ad ri-M̗ajel̗ ilo Springdale.