Ukok jān M. Langmos

Read in English: Many Marshallese Communities in Direct Path of Solar Eclipse

Juon penjak in aḷ enaaj alikkar ilo wāween an tal jān Texas ñan Maine ilo Eprōḷ 8 raan. Jukjukin pād kein an RiMajōḷ ro ilo Keene, Texas renaaj lo penjak in aḷ in ilo awa kane 1:40 ḷọk ñan 1:45 ilo raelep, im ro ilo Evansville Indiana renaaj loe ilo awa kane 3:05 ḷọk ñan 3:10 ilo raelep.

Ilo jejjo wōt minit, Laḷ eo, Allōñ eo, im Aḷ eo renaaj pād ilo juon iaḷan ekkar eo im allōñ enaaj pinej aḷ im enaaj ṃōkaj an marok āinwōt raan en lọkun aḷ, im enaaj kōṃṃan bwe jidjid in boñ ko ren ḷōmṇak bwe ebboñ im jinoe aer jidjid, akō ejja ilo iien in wōt enaaj bar ṃōkaj an meram. Ejja ilo tōre in wōt, ejjab juon ḷōmṇak eṃṃan bwe kwōn kalimjek ḷọk aḷ ilo tōre ñe bōtab ewōr māj kilaaj rejenoḷọk eṃōj kōṃṃani ñan kain iien rōt kein āinwōt penjak in aḷ,  kwōnaaj maroñ in loe jidik wōt riiñ in meram ipelaakin ijo allōñ ej pād ie. Kwōmaroñ pija kōn poon ko ak kwōj bar maroñ kalimjek annañin ioon bwidej.

Fayetteville im Springdale, Arkansas rejjab pād jejjet ilo iaḷan penjak in aḷ in, bōtab eṃōj katmāne bwe aḷ enaaj penjak ippān allōñ 97.5% ilo awa kane 1:50 ḷọk ñan 1:55 ilo raelep. Jones Center eo enaaj pojak ñan an leḷọk solar māj kilaaj ko ilo Fam Jam event eo aer ñan ajri im baaṃle ko ñan kōjerbale ilo Ṃande ālikin raelep ñan kōjparok mejaṃ ilo aṃ lale penjak in aḷ in.  Public School ko an Springdale Arkansas rej barāinwōt leḷọk kilaaj ñan rijikuuḷ ro bwe remaroñ lale penjak in aḷ ilo ālikin raelepen raan ne im eban jorāān. 

Jouj im tag e Chikin Melele elaññe kwōj ḷōmṇak in kwaḷọk im leto letak pija ko nejūṃ.